最近足無閒，一直無時間寫 #課綱 佮 #語言名稱 ê 代誌，先簡單交代一下。
1.語言名稱是語言名稱，課綱 ê 科目名稱是
#科目名稱，確實無法條規定語言名稱著愛佮科目名稱仝款。這个講法我本人無認同，總是，袂當講完全無道理。
2.客語是一个語言(科目)名稱分6腔，原住民族語是一个語言(科目)名稱分16族，是按怎台語袂使比照？嘛有人問講，是按怎台語、客語、閩南、閩東袂當攏比照分族就好？彼是因為16族 「共用仝一份領綱」，這份領綱有一个「共同 ê 科目名稱」；客語6腔嘛「共用仝一份領綱」，毋過客語佮台語/閩南語無使用仝一份課綱，所以袂當按呢比照。
3.閩東語（馬祖語）uan-na 有家己 ê 一份領綱，因為連江縣政府教育處認為馬祖 ê 特殊性（主要是「戰地文化」）無適合佮臺灣用仝一份領綱。因為有無仝內容 ê 領綱，所以科目名稱嘛無仝。
4.台語澎湖腔嘛有特殊性，縣政府嘛有自編教材，毋過目前看起來，澎湖人認為這个語言叫台語抑是閩南語攏會使，嘛無需要加一份 in 家己 ê 領綱。
5.金門閩南語 ê 狀況較複雜，大部份 ê 人認為這个語言毋是台語，對 in 來講，「台語」這个名是 1949 以後才有 ê，佮臺灣本島人 ê 經驗無仝，所以 in 認為袂當共這个語言叫做台語。（其中 ê 國家認同問題先閬過）
6.毋過，金門各場座談 ê 參與者，多數認為無需要加一份 in 專屬 ê 領綱，金門閩南語會當佮台語共用領綱。若是按呢，這份領綱著愛有一个科目名稱，欲叫啥？
7.佇咧這个斜槓(tshiâ-kǹg) ê 時代，我初步 ê 想法是：科目名稱會使叫做「台語/金門閩南語」。橫直金門 uan-na 有縣編課本，臺灣優勢腔有「優勢腔列方言差」 ê 書商課本，袂互相礙著。
這个議題閣有誠濟論述佮行政細節需要說明，以後才寫。用一張佇金門某一个展覽翕 ê 相，來做這个議題 ê 干證。
