2020年11月12日 星期四

台語課室評量的出題方法


最近一直咧修題,想講共一寡心得整理一下。基本的出題原則無講,這篇主要欲講「按怎針對課本的內容來設計選擇題」。


一、考理解的選擇題捷看著的錯誤

閱讀測驗的「文章理解」佮聽力測驗的「音訊理解」攏會當出選擇題,形式通常是有一段文字,閱讀就用看的、聽力就用聽的而且看袂著文字,後面綴2-4條選擇題。「理解」,是欲考「我看/聽著信息,無論長短,敢會當了解信息的意思」。這款題型較捷看著的問題有:

1.題目毋是考著理解,煞考著「有看/聽著抑是無看/聽著」
2.考著文章/段落內底無寫/講著的,有時仔是考智識,有時仔是過度推論;
3.考了傷細節、傷幼,抑是顛倒反,真濟內容有寫/講煞無考。

12點毋若是考台語能力,閣去考著注意力、智識。當然,理解有「資訊提取」這个層次,聽佮讀攏是,有時仔會使,毋過毋通逐條攏考這款。

若有第3點,真有可能就會犯著12點,若無犯著,遐的無考著的內容單純是拍損,嘛有可能內容傷長。

 

二、對課本到考題:閱讀理解

課本的內容會當提來考的其實無濟,尤其咱上課就講遐濟改矣,若照搬仝款的內容來考,一方面你毋知學生是理解抑是背起來;另外一方面,就算是課本的內容,咱嘛無希望是考著「敢有背」,咱猶是愛考「敢有理解」。

 以康軒第5冊第3課「鳥鼠欲搬厝」做例,我會按呢來設計:

 ()共素材的重點箍出來

 以下是課文的內容佮我箍的重點詞:

鳥鼠鳥鼠欲搬厝朋友講欲送家具。 
桌椅眠床攏有嘛有衫櫥冊櫥會當用久久久
若欲送就送麵龜,咱來食飽嘟嘟

 

()選考點:句法

普通名詞較歹考,若欲單獨考詞彙,上好有形容詞抑是動詞。這課有一个語法點「若欲......就」,咱另外造一句就會當考意思,拄好第一課是節日,就會當做話句的背景素材,比論講按呢:

1.「阿爸講,最近定定食月餅,若欲食點心就食豆花。」下面佗一句有符合阿爸的意思?
(1)阿爸這馬足想欲食月餅
(2)阿爸這馬足想欲食豆花
(3)月餅佮豆花阿爸會選月餅
(4)月餅佮豆花阿爸會選豆花

「若」欲表示「毋是一定愛」,「就」後面接的是選擇的結果,兩層意思,拄好分別設計兩个選項。

 

()共重點詞鬥做新文章來考理解

這是考理解上利便的方式,毋過因為是課堂的考試,是成就測驗毋是能力測驗,所以愛注意用詞袂當超過學生的程度。閣來,文章內底愛有較濟形容、動作、事件、感想、說明等等,按呢才有理解的題材通出,若是攏名詞排列,就會想無題目,仝款這課的內容,前文按呢:

阮兜的冊櫥枋仔斷去矣,欲換新的(事件),阮規家伙仔做伙去買。賣場人有夠濟(形容),逐家買物件袂輸咧搬厝(重點詞+形容)。遮的家具真特別,毋管是眠床、食飯桌抑是鞋仔櫥,攏會使買轉去家己組合(重點詞+說明),阮最後選有鳥鼠尪仔圖的冊櫥(重點詞+形容),下暗有工課愛做囉(事件),希望家己鬥的會當用較久咧 (感想)
1.作者是按怎欲去家具店?
(1)𪜶兜欲搬厝
(2)舊的家具害去矣
(3)去欣賞特別的家具

2.作者買的冊櫥有啥特色?
(1)買冊櫥送尪仔冊
(2)佮鞋仔櫥是仝一組
(3)搬轉去無法度隨使用

以上連標點114字,會當出2-3條,遮干焦示範2條,因為是三年仔,選項3个就好。2條攏愛看有文章、理解以後才選會出來,選項攏是文章內底有相關的詞 (這真要緊,錯誤選項uân-nā愛設計,佮文章完全無底代的選項無意義,學生若去選只是烏白選抑是選毋著),若是無真正理解,就會花去。

 

三、對課本到考題:聽力音訊理解

「音訊理解」的「理解」,是欲考「我聽著信息,無論長短,敢會當理解信息的意思」。

遮用真平第11冊做例。頭前兩課〈伴手〉〈出國〉大部份是「地名、國家名、族群名、食物名」,主要是名詞,有少部份的動詞,內容攏是較單純的「資訊」,無情緒、事件、解說等等,若是直接共課本內容提來考試,就會較無「理解性」的題目通好出。這款內容較適合出「建構反應題型」的題目,比論講:列名詞予學生朗讀、問in出去𨑨迌的經驗、對食物的看法等等,真濟題材會當出。

3課〈電腦揀塗豆〉就較有描述性的內容,基本名詞以外,有對話、有解說,45兩課就閣較濟內容,形容詞、動詞、語法詞攏加較濟,閱讀佮聽力攏較有通考。

針對聽力,有兩種思考題目的方向:

()課本內底教過的詞彙佮句法,學生是毋是真正理解、會曉使用?

設計方法:取一个詞抑是一个句法做考點,設計一、兩句話,愛真正理解彼个詞才選會著正確的答案。比論講考點是「真好禮」:

問題:下面佗一个行為,咱會講伊真好禮?
(1)送人禮物足大方 (2)真守規矩袂亂來
(3)拄著人會相借問 (4)摒掃的時真骨力

(會當想看覓選項是按怎按呢設計)

()遮的詞彙佮句法,若是出現佇完全無仝的情景內底,學生敢仝款聽有?

設計方法:取幾若个詞佮句法,重組一段新的故事、包含新的內容,來考規段的理解。佮閱讀的前文仝款,愛盡量有事件、說明、情緒,聽力有另外一个真好出的,就是代誌發生的前後順序,屬較複雜的「資訊提取」。

像第4課〈阿川真好禮〉課文佮補充詞,我會揀遮的重點:上(tsiūnn)車、拄仔好、賰、隨...、徛起來、好禮、勇健、會堪得、毋免、讓位、那............、揤落去、無偌久、呵咾、幾若擺/站、是按怎、有孝、骨力、好笑神、巧等等。

用遮的詞編一个故事,嘛會使參考備課用書針對這課尪仔圖的內容改寫。下面這个例是宜蘭孝威國小周老師,根據頂面的原則設計、我修改補充以後的結果:

學生聽著:

有一工,阿公坐車欲去予醫生看,上車的時拄仔好攏無位,有一个少年人隨徛起來讓位予阿公。阿公呵咾伊真好禮,閣講家己閣誠勇健,會堪得徛,毋免讓位予伊,就共少年揤落去坐。過無幾站,少年人先落車,阿公才坐彼位。到病院,阿公一下落車,就看著阿爸已經佇病院門口等,原來阿爸煩惱阿公一个人無伴。阿公感覺真感動,轉來講予我聽。

以下學生聽會著嘛看會著

問題第1條:阿公坐公車欲去佗位?
(1)去運動  (2)去學校  (3)去病院  (4)去揣阿爸
 
問題第2條:阿公佇公車頂徛偌久?
(1)徛規路  (2)徛一時仔  (3)徛一站  (4)攏無徛著
 
問題第3條:阿公感覺真感動是因為𪜶In囝按怎?
(1)真勇健  (2)真好喙  (3)真好禮  (4)真有孝

課本有的內容、咱揀出來的重點詞,無一定愛全部考,盡量佇前文出現就好,就有達到咱課室評量的目的矣。

----------

以上一寡仔出題的思考方式予老師參考。成就測驗佮能力測驗目的無仝,題目設計的鋩角嘛無仝,這篇是針對成就測驗,毋過有的技巧是仝款的喔。

2020年9月19日 星期六

台語朗讀文章的往事

欲來記錄一个咧欲袂記得的往事,是有關全國語文競賽台語朗讀文章。

我猶佇咧大部食頭路的時陣,拄著朗讀文章幾若冬攏是舊稿的問題,就有一个決議講,會當共文學獎的作品摘段落出來做朗讀文章,我就是執行這个決議的(?)人。

實際上做lueh才發現足困難,第一,彼時的作品實在講程度無這馬遐好;第二,台語文學作品無一定適合予選手讀。選規晡實在選無幾段通好用,閣袂當傷kāng改,因為授權修改的範圍干焦用字,為著避免爭議,準我佮改稿的老師感覺規句話實在袂順,嘛是毋敢共改。

結果當然就是予人撟甲欲戇去。其實我上早知影遐的文章有偌歹唸,因為我是頭一个自頭唸甲尾的人。後來有陸陸續續補充幾篇仔sia̋n-pái等級的老師寫的文章,毋過一來量少,二來sia̋n-pái的文章有時仔閣傷深,無好讀。

我感覺按呢袂使,想講既然批評遐濟,應該有真濟人真gâu寫,哪毋規氣來徵稿,請逐家針對「朗讀文章」的性質佮字數來寫稿,咱才來選。毋過,因為種種的原因(其實我袂記得原因是啥矣),這个提議無hōng接受。

按呢問題無解決啊,看遐的文章我嘛足痛苦,就開始想空想縫:文章一定有,欠的是管道,按呢我敢會當創造一个管道?若是講,有一个公開的blog(著啦彼時猶干焦時行blog),頂頭有足~濟適合的朗讀文章,閣揣會著作者,作者閣願意授權,按呢承辦人員看著、共頂頭報,適合收入來的文章由官方發授權同意書予作者,按呢毋就解決矣?

大部並無規定我下班袂當做台語的工課嘛,所以我就去申請一个平台,叫做「朗讀文章大擂台」,邀請眾有志佇遮發表文章「予逐家欣賞」:

👉👉👉

2011-10-13 06:36:19| 人氣341| 回應0 | 下一篇

人客你好,請入來看擂台說明
  • 你敢知影,逐年攏會舉辦的「全國語文競賽」有「閩南語朗讀」這項?
  • 好看的文章無一定好讀,好讀的文章一定好看,你敢贊同?
  • 拄接觸台語文的朋友,你敢有想過,寫台語文學作品你嘛做會到?
  • 台語文的前輩,你敢願意繼續掖種,將你感動人心的文字,化做一粒一粒的樹子,生湠閣較濟台語的花蕊?
  • 比賽是形式,語言佮文學,傳承佮創新,是背後的意義!
 這个Blog欲做啥物?
1. 將收著的文章貼出來,予逐家欣賞。
2. 若是來稿有夠濟,就會辦投票,逐家鬥陣推薦好文章。
3. 精選的文章,交予閩南語朗讀比賽的負責單位編輯,修改用字、加臺羅音標。
4. 邀請台語文學家分享、指導。
 
虎!我嘛想欲參加!欲按怎報名?愛注意啥?
1. 寫一篇700-750字的台語文,題材無限制,愛適合朗讀。
2. 請盡量用教育部臺灣閩南語常用詞辭典的字佮臺羅拼音。建議用「臺灣閩南語漢字輸入法」來拍字。
3. 共文章寄來「l*******@gmail.com」,批內底愛註明:
(1) 文章題目。
(2) 欲發表的名字。
(3) 愛有「我願意將文章交予『臺灣閩南語朗讀文章大擂台』blog發表」這逝字。
4. 若是選著你的文章,才會閣請你提供聯絡方式。
 
欲救台灣話,無嫌人傷濟。人才滿四界,作品欲佗揣?
愛有人鼓吹,才會有人綴。用心來交陪,逐家行做伙。
👉👉👉
(最後這幾句毋是我寫的,啥人寫的應該真好臆)

有圖為證

果然來稿誠濟,累積一段時間以後,上班模式的我,就共平台呈起lih予官長,就按呢正式選文章、請作者簽授權、邀請老師修改。頭仔開始逐家較袂計較,準我處理有無四序抑是無幼路的所在,嘛無啥hōng批評。真佳哉,後來就有正式徵稿矣,我就共這个blog收起來。

最後講兩件相關毋過完全無重要的冷情報:
1.語文競賽台語字音字型、朗讀稿的格式,是我設計的,這馬毋知有改無。彼時,某老師提出需求,我就會照伊的要求予伊成果😎
2.為著平台申請的E-mail,無需要矣就先囥咧,後來做iTxxxx的時陣,就共這个mail提來用,看有的人就會了解其中的蹊蹺佮關連😆

2020年5月7日 星期四

台語現代化:同性婚姻的稱呼問題

2019年5月24,台灣成做亞洲第一个同性兩人會當結婚的國家,台灣的文明、進步、民主、人權、自由,攏是世界it-tóo的,做一个台灣人,我感覺足驕傲的。


毋過,台灣這塊土地予幾若个政權thún-ta̍h過,咱的歷史佮文化面臨衰微以外,語言,嘛佇台灣現代化的過程中綴無著陣,致使有一寡新詞,毋管是新物仔、新觀念、新現象甚至新需求,不時會面臨無法度用台語表達的困境。


佳哉,有台語意識的人愈來愈濟,逐家同齊拍拚為台語創造新詞,佇網路抑是電視媒體出現。其中一个真熱、真烘(hang)的話題,就是同性婚姻。


包含台灣在內真濟所在的婚姻文化,有閣tsāi閣tsa̍t的父權結構,稱呼嘛是完全照這个結構來發展的,內家外家、仝姓無仝姓,牽涉血緣嘛關係財產,閣佮性別上的查埔查某有固定的對應。Tann若結婚的雙人攏查埔抑是攏查某,就完全無伊法──上基本的,新婦囝婿、大家大官、丈人丈姆,佇同性婚姻內欲按怎稱呼?


當頭對面咱干焦叫阿爸、阿母,大家、大官是「背稱」,就是佮別人講著這个人的時稱呼的方式,問題攏是出佇遮。網路上有看著『女媳』、『子婿』這款華語講法,各種稱呼攏有,基本原理就是佇原稱呼的核心成份頭前加上性別標記。唸起來袂順,嘛感覺無合咱台語的語感,而且理路並無行出性別框仔。


稱呼是對關係來的,新的稱呼,嘛著對新的關係重思考。同性愛人之間,並無娶「入來」抑是嫁「出去」的分別──上好異性婚姻嘛無。若是女性,兩爿的爸母攏加一个查某囝;若是男性,兩爿的爸母攏加一个後生。既然按呢,就應該無分大家/丈姆、大官/丈人,攏是爸母。


這个新關係建立佇「婚姻」。就法律來講,婚姻就是一種民事契約,契約就是人佮人之間的約束。毋是干焦佮財產有關係的代誌爾爾喔,「契」佇咱台語內底會用佇一个足重要的所在:契爸、契母、契(查某)囝。


台灣傳統對認契爸母是真慎重,毋是講講咧就準拄煞。通常有「捾水米」的儀式,象徵「有共你養飼」,嘛有人會拍金仔予契(查某)囝,甚至佇訃音頂,有食水米的義子、義女是佮後生查某囝排佇仝位階的。


講來,這嘛是一種約束:約束來做親人。照這个理路,「因為婚姻關係來成做親人」,嘛是一種約束。愛人仔的爸母就親像家己的契爸契母,精差佇這个「契」毋是別款「契」,是限定佇「因為婚姻關係產生的契」,所以會當簡稱做「婚契」。


按呢代誌就簡單矣。「加一个後生/查某囝」加上「婚契」的概念,所有同婚關係內底的背稱,攏會當就原本血親的叫法,佇頭前加一个「婚契」:婚契爸、婚契母、婚契囝、婚契查某囝、婚契大姊、婚契小弟......賰的就照樣畫鞋範


若是阮翁、阮某,會當照用,嘛會當改用「阮牽的」。若是『配偶』,因為是法律名詞,建議猶是直接唸「phuè-ngóo」就好,共當做外語來處理,畢竟法律條文並無台語版,毋過佇口語,會當使用咱在來的用語「頭對」。


「婚契」的用法閣有一个好處。雖然會當結婚、有法律地位,毋過社會上的氣氛、偏見,予真濟人毋敢、毋願予外人知,毋過總是會拄著抑是講著,無方便「出櫥*」的人,只要共「婚契」的「婚」省略、賰「契」就好矣,無欺騙、真自然。甚至佇訃音頂嘛是會當按呢處理。


這个邏輯,完全是對台語出發來思考的,若欲用佇華語,若像會拄著問題,這就留予華語人去操煩。


原來咱台語的骨髓內底,有對進步觀念的「超前部署(tshiau-tsiân-pōo-sú)」。




*出櫥:華語講『出櫃』,對英語Coming out of the closet(Coming out)來的,用台語講就是「行出衫仔櫥」,照台語的構詞,會當講做「出櫥」。