2022年4月8日 星期五

貓仔

貓仔無去了後,厝內加誠恬靜。

老歲仔貓,無像囡仔時代會佇厝內kho̍k-kho̍k-tsông,大部份ê時間其實攏咧睏,kan-na腹肚枵佮欲愛人共捋毛ê時會iaunn,照講袂差遐濟。

「閣減咱佮伊講話ê聲音啊。」牽ê按呢講。

「咱有遐捷佮伊講話喔?」凡勢有。

細漢,伊無啥會iaunn。應該是兩禮拜大ê時接過手,我大學畢業拄出社會,伊猶未斷奶,三點鐘愛飼一改,我只好共伊偷偷仔載去公司,佇超商買牛奶,伊食一湯匙、我食180CC,彼段時間我牛奶啉有夠濟。

斷奶了後,我去上班、伊就家己屈佇我稅ê房間,囡仔貓愛四界tsông,頂頂下下,飛天鑽地。房間地板是磨石仔,我共tshu鬥片仔地毯,逐工下班轉來定著隨片拆拆掀掀開。彼時伊攏無聲,袂輸啞口。第一个過年,共放佇房間兩暗無人陪,我轉去彼工伊iaunn甲偌激動。原來毋是啞口,是金喙毋願開。

一目nih,已經是20冬前ê代誌。20冬,毋管感情佮事業按怎起起落落,貓仔抱leh,就是上大ê安慰。

老貓佮老人攏仝症頭,生骨刺,龍骨骨節相黏,有時伊疼kah會哀,食保養品以後有改善,總是,行路愈來愈食力,跤腿ê筋肉開始消瘦,不時會軟跤,前跤跤骨嘛變形,後來閣放血尿,予醫生看嘛無路用。佳哉後來朋友介紹一位好醫生,共阮解說講,遮ê症頭攏是因為龍骨相黏ê疼造成ê,好袂tsiâu-tsn̂g,建議阮予伊食神經性止疼藥仔,維持伊ê生活品質就好,莫閣做啥治療。

經過伊ê開破,阮嘛開始接受,都食kah這个歲矣,逐工ê日子攏是趁著ê。

趁kah彼工,伊毋食矣。嘛毋是毋食,有想欲去食,毋知按怎煞喙去bak-bak--leh就走。伊本底就足瘦,胃口閣誠好,閣較袂堪得無食。阮看毋是勢,用注射筒灌肉湯予伊食,伊勉強吞落,嘛是閣吐吐出來,灌食ê時伊會滾躘,看著足毋甘,足毋甘。

伊是毋是想欲離開矣?勉強共留leh,敢好?

後來,連水都毋願啉,kan-na the佇膨椅喘氣,閣不時想欲換位,若像按怎都無四序。彼暗,阮共抱佇眠床邊,電火毋敢禁,睏袂落眠。伊已經無行路ê氣力,煞毋知按怎,一下仔欲去客廳,一下仔欲來房間,阮就順伊ê意,共伊抱過來、抱過去。

早起,牽ê上早班已經出門,我歇睏。一下精神隨去共看,仝款倒佇膨椅,喙已經有小可仔開開。阮有查過資料,知影伊隨時就會老去矣。

共伊mooh去曝日,伊無愛;佇膨椅tshu一塊毯仔予伊倒,伊閣一直想欲peh起來,可能傷光;共徙去內底勢倚壁ê位,伊就無閣起來矣。我坐佇伊身邊,輕輕仔共摸,心臟猶有咧跳、有喘氣,只是毋知人矣,像阿媽彼時仝款。彼工,我嘛是覆佇阿媽身軀邊,摸伊ê頭毛佮面,共伊講,阿媽,真多謝你。

心肝仔貓仔,真多謝你。你圓lin-lin ê 目睭,古錐閣巧神,恁老母喔,較妝嘛無你一半媠。心肝仔貓仔,真多謝你,有夠矣,若欲去,免掛意,嘛毋通驚惶,阿母佇遮。

賰氣絲仔,目睭金金,聽講就是會按呢。我毋甘看嘛毋甘走,伊蹄仔冷冷,攏無振動。最後,小躘一下,一口氣吐出來,無喘氣矣,心臟iáu勻勻仔跳,無偌久,佇我手底,跳上尾一下。

我提衫共崁leh,袂擋得,háu出聲。

欲暗仔載伊去火化,焚化爐hōng-hōng叫,我佮牽ê攏無講話。中途,火葬場ê工作人員共thà-thà--leh,伊佇遐,嘛無佇遐。

「好矣。」彼个人共骨頭烌pué-pué出來,捀來阮面前。我共伊ê毯仔mooh牢牢,無矣。彼个人講:「阮做這途,看誠濟矣,勸你一句,在生有共惜就好。」

好。細細罐仔ê茶米罐,貓仔造型。開門,「貓仔,咱轉到厝矣。」

無貓仔ê日子嘛是愛繼續,仝款起床,仝款上班,仝款下班煮食,只是毋免飼貓仔、免摒貓仔砂矣,嘛無貓仔通抱,袂閣佮貓仔講話矣。

阮共囥佇結婚證書頭前,約束予好,等阮攏變做罐仔,就會使囥做伙矣。