2018年11月7日 星期三

彼號話(Hit-lō-uē)

彼號話(Hit-lō-uē)
 
一位台語界差不多逐家攏熟似ê sia̋n-pái真愛講一个詞:”Hit-lō-heh”,便若拄著毋知按怎解說、無想欲解說、抑是欲解說予清楚會真費氣ê時陣,就會當用”Hit-lō-heh”來代替。
 
比論講,人問你是按怎欲用海翁來共家己號名,你心內可能有幾若个理由,毋過你知影對方根本毋是真正欲了解,就會當應講:「啊就因為Hit-lō-heh,所以按呢號。」抑是人質疑你支持ê候選人,問你是按怎欲伨伊,你知影對方只是想欲共你唱聲,你嘛會當應講:「伊就真Hit-lō-heh啊,所以我共支持。」按呢來共對話結束。
 
近來(其實是一直以來),照講是台灣上濟人使用ê語言,因為外來政權ê壓迫,致使伊咧欲佇這塊土地頂面消失去,佳哉開始有真濟人要意、想欲共救,嘛要求政府愛有作為ê時陣,這个語言其中一个大問題,竟然是伊ê名稱。
 
咱袂認為「臺灣大學」獨佔「臺灣」兩字,咱袂認為「臺南」侵犯高雄佮屏東正港南爿ê地位,咱嘛袂質疑有幾若種語言存在ê英國是按怎干焦英語會當叫做英語。偏偏這个照講是台灣上濟人使用ê語言,煞袂當用「台灣」這兩字,喔,嘛袂當用「台」這字。
 
過去,這个語言本身是禁忌;這馬,這个語言ê名字煞嘛變做禁忌。對要意這个語言ê人來講,復振這个語言,佮人權、尊嚴有關係,tann煞予人要求愛佇「壓迫者硬共你改ê名」佮「相對弱勢者討厭你共你號ê名」其中選一个,無,就是沙文、就是霸權。
 
無按呢啦,規氣,咱叫伊「彼號話(Hit-lō-uē)」,毋但毋免佇兩个漚名內底選一个,嘛佮「相對弱勢者討厭你共你號ê名」足倚音lioh
 
其實,逐家攏是台灣人,講實在ê,台灣兩字做逐家提去用,無人欲獨佔啦,只是有一寡人較捷用爾爾。
 

2018年8月29日 星期三

失敗 ê 選舉操作

 原文刊登佇民報台語世界:https://www.peoplenews.tw/news/0f68f4ae-e9da-4495-8bc1-325e4d9c4a9b 

逐改選舉,規台灣就會鬧熱滾滾,較早是街頭競選車、政見發表會捙拚咧鬧熱,時代改變,傳播速度真緊、少年人創意無限、「酸民、鄉民」滿四界 ê 網路街頭,閣較精彩。傳統 ê 政治人物開始佇選舉操作內底,設計共少年人siânn ê 元素佮策略,是講這款做法若一下無細膩,票討袂著無打緊,閣會笑破人 ê 喙才是害。今年台北市長選舉就有兩个例:姚文智、丁守中。

7/23,丁守中舉辦記者會,推出伊個人 ê 形象bàng-kah人物「叮叮」,閣有一段文字:「熱愛台北生活 ê 人民,攏是叮叮;堅持民主理性 ê 人民,攏是叮叮。」佇網路世界hōng剾洗甲反過。「丁丁」原本是英國幼兒節目「天線嬰仔(Teletubbies)」內底 ê 角色,佇網路是用來講人「戇呆、悾歁」。丁守中毋但講家己是叮叮,閣講咱逐家攏是叮叮,莫怪四界攏有人咧kiāu講「你才叮叮,恁全家攏叮叮」。想袂到按呢猶未煞,7/28,伊閣佇面冊粉專鋪一个gif,踮遐咧假古錐回應講:「著啊,恁全家、阮全家,咱攏是叮叮!」真正予人白睚píng對後擴去。

姚文智咧?7/25,伊佮黨內議員參選人為著選舉宣傳做伙翕相,共飼佇厝內 ê 貓仔Togi𤆬出門hōng採訪,講伊前兩隻貓仔嘛攏叫Togi,一隻中毒死、一隻因為in某有身送人,這馬這是第三隻。報導一下出,伊對待三隻貓 ê 方式予逐家kiāu甲。這欲補救本來是無困難,想袂到伊佇8/5推出一組bàng-kah,代表伊 ê 三隻Togi,模仿動漫人物 ê 氣口講:「欺負Yao ê 齒盤鄉民就予我來共in教示!」這聲完全無救矣,網路詈聲無停睏8/8,毋但bàng-kah落架,連已經經營一段時間、有袂少人揤讚 ê 粉專嘛關起來,另外閣開一个新 ê 口座。

政黨立場先無論,這兩位攏是in黨內袂䆀 ê 人才,毋才會當競選首都市長,尤其是姚文智,有豐富 ê 高雄經驗,佇台北嘛釘根真久。這兩改風波,講來佮市政並無關聯,是按怎會行到這款地步?

In原本攏想欲改變傳統政治人物 ê 形象,利用流行文化共少年人箍倚來,毋過,in對流行文化抑是次文化根本都無了解,煞嘛無認真研究,對「潮流」有一種「家己想家己著」 ê 錯誤認知,凊凊彩彩就提來操作,按呢根本就是共in想欲倚近 ê 對象看做是悾 ê ,拄好反倒轉呈現出家己 ê gû-tû,莫怪操作規晡,kan-na予人看著「戇呆 ê 丁丁、假gâu ê 姚爸(Iâu-pah)」。

選市長毋是選明星,猶是愛加佇政策佮民主價值下工夫,毋通傷過煩惱家己「無夠趣味」。

2018年6月6日 星期三

十二年國教新課綱佮本土語言

新聞定定teh講ê「課綱」就是「課程綱要」ê簡稱,分做「總綱」佮「領綱(領域綱要)」。總綱規定教育目標、學校應該愛教ê科目佮節數等等共同ê制度,領綱規定各領域、各科目ê內容。本土語言佇國小有一節必修,就是總綱內底ê規定;前幾冬,咱所訴求ê「國中必修」無機會實現,嘛是因為新修訂ê總綱佇2014已經正式公佈。影響國家教育規範ê總綱無適合傷tsia̍p修改,所致欲有機會改變國中本土語言ê節數,確實愛等甲斑鴿(pan-kah)吼。

定著ê代誌先囥邊--仔,咱先共眼光釘佇會當拍拚ê空間。自2014總綱公佈開始,各領域ê「領綱」嘛開始修訂,包含本土語言。本來按算佇2018年實施ê新課綱,因為領綱袂赴公佈,決定tshiân到2019(根據教育部ê講法,欲照時間實施,猶誠拚leh)。新ê十二年國教新課綱,佮九年一貫舊課綱,上明顯ê無仝,就是「核心素養」ê觀念。

照國家教育研究院ê定義,核心素養是指一个人適應這馬ê生活佮面對未來ê挑戰,應該愛有ê智識、能力佮態度。台灣師範大學心測中心(就是辦理國中教育會考ê研究單位)佇這个基礎頂懸,閣加上「行為習慣」,加強核心素養ê架構(kà-kòo)。其中,智識佮部份ê能力,會當借會考來測量;態度佮行為習慣,就愛靠佇學校內底ê「課室評量」,這嘛是心測中心當teh拍拚ê工課(khang-khuè):發展國中佮國小ê全方位評量系統,無用分數、用「等級」來了解學生學習ê效果。

國小ê本土語言評量,嘛仝款會當用這套系統來做,毋過,面對新課綱ê新理想,煞拄著一个大問題:咱連「能力」to猶未培養好勢,是欲按怎談素養?全國本土語言課程師資佮學生ê程度懸低差甲真大碼,欲按怎推捒閣較了時間ê評量方式?閣較莫講,真濟家長根本無要意本土語言課程,嘛袂要求囡仔ê學習佮表現。

雖然這个困難真oh解決,毋過,應該做ê猶是愛做。用另外一个角度思考,就是因為咱起步較晏,顛倒會當自頭就有較周至ê目標:教學生智識、能力以外,嘛同時培養學生ê態度佮行為習慣,予咱ê囡仔,學本土語言、會曉使用,嘛對咱ê母語有正面ê態度、建立使用母語ê習慣。雖然聽起-來若像傷過理想性,毋過,教育本底就應該愛有理想,沓沓仔粒積,總是會看著成果。

原本刊佇:
https://www.peoplenews.tw/news/19b898fd-116e-4b7e-854f-1a6a87613fc4


2018年4月21日 星期六

對通姦除罪化ê誤解



原刊載佇民報台語世界
http://www.peoplenews.tw/news/14f2a422-8d07-4857-801f-f6b495ba9e51

真濟人一下聽著「通姦除罪化」就會氣phut-phut、狂phiann-phiann,認為提倡者真無道德,按呢lueh,無論你有結婚無結婚,欲kah啥人tàukah啥人tàu,會造成社會穩定ê大危機。毋過你敢知影,tsit-má全世界干焦賰Islam國家kah台灣,共通姦算做犯罪niâ。敢有影?敢講全世界大部份ê國家,結婚了後攏會使kah別人烏白來?掠狂進前,咱先共「通姦罪」ê意思kah對「通姦除罪化」ê誤解講予明。

通姦是指kah法定配偶以外ê人發生性行為,咱講偷食、討契兄、tàu夥計等等。「婚姻」ê效力,是「民法」來規範ê,其實就是契約ê一種,違反婚姻這个契約,當然愛受違約ê處罰,比論講民事賠償、對方會當訴請離婚等。也就是講,毋是偷食無代誌,若予人掠著,應該賠ê嘛是愛賠,古早人用「洗門風」來賠償,就是這號道理。人若欲kah你離,咧講條件ê時陣嘛較無贏面,金錢ê損失掠外,囡仔凡勢也會離開你。

毋過「通姦罪」ê這个「罪」,意思是違反「刑法」,kah刣人放火做賊偷,是用仝一phō法律來「判刑」,是愛掠去關ê lioh。人生海海,無拄著啥人知,感情、婚姻予國家用刑法來插手,對現代民主國家ê體制來講,實在傷譀。這毋是道德問題,是國家ê法律對人民ê干涉無應該遐深ê問題。所以講,「通姦除罪化」,是欲共「通姦罪」對刑法內底提掉,用「民法」來保障婚姻契約就有夠額。

有人認為,通姦罪是弱勢女性最後ê武器,會當保障女性ê權益。咱斟酌想一下,弱勢抵抗ê對象應該是強勢者,毋過實際上,上捷發生--ê煞是「弱弱相殘」,因為通姦罪是「告訴乃論」,通姦ê兩个人會當分開告。目前tàu夥計ê人比討契兄ê人ke真濟,加上社會對女性、男性ê期待差真大碼,致使做某ê定定是干焦告「狐狸精」,袂去告家己ê翁婿,結果咧?偷食ê人無代誌,可能仝款是予愛情ê騙子害著ê女性,煞著愛hông掠去關,做某ê敢有贏著啥?「一口氣」以外,其實嘛無。

當然,嘛有人認為,人生在世就像「法蘭西水——食一點氣」嘛!佇遮,無欲做人生道理ê款勸,主要是向望考慮贊成抑是反對「通姦除罪化」進前,毋通有誤解,才會當好好仔思考kah討論。

全文音檔:



2018年2月9日 星期五

罪犯推樣(Criminal Profiling)ê先行者

原刊載佇民報台語世界
http://www.peoplenews.tw/news/84931598-91fb-42d6-b4f5-99de389fa845

圖片來源:NETFLIX

人刣人,可能是為錢、為愛、為報冤仇,有動機、目的佮對象。毋過,歷史上有真濟殺人犯,伊刣人,無一定要意對象,就單單是想beh刣濟濟人;有ê甚至是kā對方刣死以外,閣有咱想袂到ê恐怖凌治。對這款人,咱希望緊kā掠起來關,上好緊kā考銃(khó-tshìng)──嘛有人認為應該愛kā凌治kah死──這款「正義之士」殘酷無較輸ê心態先莫講,遮beh講一个佇in身上發現「價值」ê故事。

免反白仁,tann毋是beh講改過自新,毋是beh講in uân-na會當對社會有貢獻。三、四十年前,美國一个FBI探員想beh問講:In會按呢做,敢是in天生是鬼怪?抑是啥物代誌予in沓沓仔變款?In ê心內咧想啥?In ê行為敢有模式?若是咱對in較了解,是毋是會當幫助咱掠著遮ê惡魔,甚至佇伊猶未變魔王進前先kā擋落來?

這个探員名叫John Douglas,1980左右,佮FBI行為科學部門ê同事,進行一項訪談研究:In去揣惡kah無人問ê殺人犯做訪問,kā錄音、紀錄,才閣佮心理學家同齊分析。後來in發展出「罪犯推樣(Criminal Profiling)」,就是累積經驗、建立模式以後,就會當根據犯罪者表現出來ê行為,來推測伊是啥物款人,kā嫌疑犯ê範圍縮小,較揣會著。

John Douglas佇十冬前kā這个過程寫冊出版,網路影片商Netflix kā改編做影集「破案神探( Mindhunter)」(冊嘛綴咧出新版),佇咧犯罪類影片tsiah時行ê時,猶會當有鋪排路線無仝、幼路閣精彩ê作品,實在無簡單。

影集內容遮無beh加講,咱仝款來問FBI官長上頭仔問ê問題:了解殺人犯ê想法beh創啥?若是tsit-má,咱會當用袂輸較有學問的方式問:「罪犯推樣」敢有意義?

上實際ê觀點是,罪犯推樣幫助警察掠著兇犯,當然有意義,甚至咱會當根據行為模式佇一个人那來那惡進前事先發覺,毋是攏講,預防才是降低犯罪ê根本?毋過,推樣無定著準確,無像會當用磅仔去量ê物件抑是用試紙去反應ê成分,伊是經驗累積到一个程度以後,提出「相對來講」正確率會較懸ê推測──總是,猶是臆ê;而且,若是講有A模式ê人較會有B行為,按呢是毋是會產生「標籤化」ê問題,造成另外一種壓迫?(這點影集內底嘛有探討著)

我想,人類對世間所有ê代誌,攏有好玄ê心,所擺真濟科學研究基本tik無啥實際用途。所以咱嘛會想beh了解,平平攏是人、平平有類似ê不幸,是按怎有ê人會做出殘忍kah咱連想都會驚ê代誌?In佮咱之間,敢真正差有hiah大碼?無的確咱每一个人攏有可能成做惡魔,只是咱好運無拄著彼个「機會」?佇政治上,屠殺人民抑是異族ê頭人,in ê內心佮遮ê殺人犯有啥無仝?敢會只是因為in較巧、有機緣,所以成做頭人,會當光明正大來刣人、凌治人?

時代ê大環境,會創造無仝ê心理因素。刣人可能是人類ê本性,毋過受環境影響,致使做出這款代誌ê理由可能會改變。以這个角度來看,犯罪心理ê研究、罪犯推樣ê發展,確實是要緊ê:人類社會註定無可能無犯罪,咱干焦會當盡量──盡量去避免產生會培養犯罪者ê環境。

錄音