蛤仔、蚶仔，到底有啥牽連？

最近因為臺灣蚶仔提著血統證明，討論kah足熱，台語人當然愛摻一跤，因為伊ê名「蚶仔ham-á」佮感嘆疑問詞 ”Hannh？（唅？）”，攏是台語。

先來定義一下。主角 Meretrix taiwanica，
台語號做「蚶仔(ham-á)」，
華語號做『蛤蜊』音ㄍㄜˊㄌㄧˊ，俗音ㄍㄜˇㄌㄧˋ。

予人搝出場ê相關配角有：
(1)蛤仔(kap-á)、田蛤仔(tshân-kap-á)
(2)螿蜍(tsiunn-tsî)
(3)蜊仔(lâ-á)，

頂面tsia--ê對應華語是：
(1)青蛙ㄑㄧㄥ ㄨㄚ、蛤蟆ㄏㄚˊㄇㄚ˙
(2)蟾蜍ㄔㄢˊㄔㄨˊ、癩蛤蟆ㄌㄞˋㄏㄚˊㄇㄚ˙
(3)蜆ㄒㄧㄢˇ

先來講歷史上久長ê「蛤」。這字《說文》就有收，音古沓切，講是海裡ê生物，閣有3種，攏是有修煉過ê動物所化（朋友啊，蚶仔是精(tsiann)，古早人就按呢想lioh），唐朝時代ê註解就講伊是「蚌(pāng)」；「蜊(lî)」佇A.D.997文獻就有出現，講伊是「蛤(kap)」。「蛤蜊(kap-lî)」兩字真早就合做一个詞，現代華語繼承這个名。

咱牽出來講一个誠重要ê觀念。漢語範圍足闊，包含誠濟語言，準有使用漢字，嘛定定有家己無仝款ê發展，毋但是音字喔，構詞、號名嘛是，也就是講，一項物件佇無仝所在、會有無仝款名。這其實足正常，tomato佇臺灣，日語掠外，就有「臭柿仔」佮「柑仔蜜」天差kah地ê兩種名，一个臭一个蜜neh！

仝款ê道理，這个水產，佇台語繼承另外一个名。「蚶」字佇文獻出現ê時代佮「蜊」仝款，嘛是足早，音呼談切，意思就是「蛤」。也就是講，咱講ê「蚶仔ham-á」，uan-na有誠久長ê歷史囉。

啊若台語teh講ê「kap-á」，我毋知影敢有本字，有可能無，取伊 "kap kap kap" ê聲音，加「仔」變做伊ê名。"kap"音用「蛤」無奇怪，因為「合」除了ha̍p（對應華語ㄏㄜˊ），閣有kap ê音（對應華語ㄍㄜˇ），加上虫(huí)字爿，就變做「蛤」，咱共kap-á寫做「蛤仔」，其實是借音。

Hannh？Ah "hannh"--leh？

（唅？啊「唅」咧？）

「Hannh」佇tsia啦：華語共「蛤」這字，提去表示『蛤蟆』ㄏㄚˊㄇㄚ˙……(Hannh？)

華語講ê『癩蛤蟆ㄌㄞˋㄏㄚˊㄇㄚ˙』就是台語講ê「螿蜍tsiunn-tsî」，『蛤蟆ㄏㄚˊㄇㄚ˙』差不多就是「蛤仔kap-á」（嘛會使講「田蛤仔tshân-kap-á」）。䢢拄䢢、千拄千，這个ㄏㄚˊ佮咱ê "hannh" 足倚音，致使逐家欲寫台語火星文ê時，自然會選擇『蛤』這字囉！可能有ê人拍出來是『蝦』，是按怎leh？因為honnh，『蛤蟆』其實本來寫做『蝦蟆』，音嘛是ㄏㄚˊㄇㄚ˙，所以你拍ㄏㄚˊ，嘛會出『蝦』。

另外，華語ê『蜆』ㄒㄧㄢˇ 就是咱ê「lâ-á」，來源是啥我無研究，寫做「蜊仔」至少是倚音，意思嘛有合。海產店ê鹹蜊仔、蜊仔湯，閣有彼號『蜆精』，攏是這款比蚶仔較細粒、色水較烏ê蚌類。

足心適honnh？好啦，文字學ê趣味，就是遮爾樸實，閣白汫無味……

最後閣補充一下，hannh會按呢標，是因為就臺羅ê體例，無固定聲調ê嘆詞，就用-h來標，所以伊毋是第4調喔！伊咱口語內底實際上ê音較接近第9調，所以若有人寫做 "ha̋nn"，袂使講人寫毋著heh。若欲寫漢字，會使用「唅」，毋過這款擬聲詞，猶是寫羅馬字較好。

家族史

閣有啥日子比清明較適合研究家族史咧？逐年講寡仔講寡仔，煞攏袂記得了了，今年閣挽瓜揫藤，共一寡仔零星資訊鬥鬥leh。原來阮兜確實佮雙溪連舉人家族有關係，閣不止仔有意思，緊共記落來。

佇我ê頂5世，阮家族分開食，有6房。阮阿爸講，往過阮一直叫是阮這房是大房，一直teh盡大房ê義務，徛家嘛是佇正身(tsiànn-sin)正爿的東廂(tong-siunn)、照講是大房蹛ê位。毋知當時發現一份文件，才知影阮是第4房。這份文件是「鬮書(khau-si)」，我手頭有影印本，立書時間是「光緒四年」(1878)。鬮書寫kah誠清楚，長房某某、二房某某……各房分著佗一塊土地。雖然阮是第4房，阮祖公ê名煞寫佇立書人ê頭一个，第一批土地是公--ê，嘛是予阮這房管理，可能是按呢才予人當做大房。

圖：鬮書

阮有祭祀公業，嘛有派下名單，成立公業ê時已經知影阮是第4房，趣味ê所在是，名單記錄ê 6房，kah鬮書寫--ê無完全仝款，有寫毋著名--ê，嘛有寫毋著房--ê，我毋知影公業敢有更新名單。

立鬮書ê前兩冬，光緒二年(1876)，是雙溪連日春（後來改名連旭樁）考牢舉人彼年。根據網路揣著ê資料，連元喬佇1781到雙溪開墾，連日春是in ê後代。連元喬in兜ê長工連泰和，因為意外之財變做好額人（這段故事我懷疑是假--ê，傷譀，時間線嘛毋著，所以先無共寫出來），就起一間lè-táu有派頭ê厝，阮阿姑講是「泰和樓仔(Thài-hô Lâu-á)」，目前我猶未揣著起造ê年代。

圖：泰和樓仔秀面（我感覺阮兜較媠）

泰和樓仔kah連舉人厝宅攏是正身護龍起，kah阮兜ê形式小可仔無仝，in ê秀面，公廳門有kiu入去，正身兩爿相對相ê門，對埕eh就看現現。阮兜的公廳門kah秀面徛平，正身兩爿相對相ê門藏佇內底。

阮家族仔（敢若是大房）ê祖公，當年欲娶泰和樓仔ê千金，為著門當戶對，講開足～濟錢翻厝（這是啥物八點檔ê劇本啦），聽講彼時阮ê厝頂有做「翹脊(khiàu-tsit)」，過路人叫是阮兜是廟，會入來阮公廳拜拜，可能有造成困擾，後來共修掉去。

啊是講，鬮書內底寫著ê田地，這馬攏毋是阮ê，阮兜咧作ê田，嘛攏是公--ê，無就是贌--ê，甚至閣有地主ê後代，做教授閣做官，佇田地起別莊。

寫到遮，我煞小可仔懷疑，當初分開食，敢就是為著翻厝需要錢項leh？百外年前ê代誌tann嘛無地通稽考矣，畢竟，阮是連家己第幾房都會hut毋著去ê家族啊！