頂禮拜五阮有員工旅遊，下晡 ê 行程是踅廟口，我斡去「許梓桑古厝」參觀。講古厝，是已經荒荒廢廢，樹根佮壁堵交纏，正身無厝頂，大廳有一大塊烏布，我毋敢掀開，應該是厝頂瓦 gih-gih 疊疊佇遐。
雖是如此，猶是看會出來古厝原底ê規模佮氣勢。兩層樓懸，樓梯佇室外，peh 起去二樓才是埕佮正身護龍，可能因為欲起佇二樓，毋是蓋大間，毋過「佇二樓 ê 埕」就有夠奢颺囉。厝原本就起佇地勢較懸 ê 所在，徛佇二樓大埕，雖然這馬視線已經予大樓閘著矣，毋過會當想像，原本應該是看會著規个雞籠港。
最近 teh 看雙溪佮槓仔寮 ê 鄉誌，想欲了解當初開墾 ê 歷史。雙溪捌出過一个舉人連日春，雞籠嘛有一个江呈輝，原來江呈輝毋是干焦佇雞籠活動，伊有去到三貂社，佇雙溪外柑蹛過，娶連日春ê大漢查某囝，後來轉去雞籠設立「崇基書院」，許梓桑是伊 ê 學生。日本人占台以後，伊就轉去原鄉，後來轉來台灣「省墓」，就蹛佇許梓桑 in 兜 neh！
---------
共鄉誌對照洪老師ê閩南方言地圖來看，有影心適。洪老師共老漳腔分做漳山佮漳海，阮故鄉遐算是伊分類內底ê漳海，有 -uinn 無 -ionn，老師認為這个分別佇原鄉就已經產生，這條線畫佇「長泰」西爿，長泰境內就有-ionn 囉。毋過雙溪 ê 大家族攏是長泰來 ê，哇，愈看疑問愈濟，若這馬 ê 長泰猶有-ionn，按呢雙溪無 neh，敢講古早雙溪猶有-ionn？若雙溪有，阮槓仔寮應該嘛有啊！
（頂面彼條線是寫 kah tsia才畫 ê，因為 honnh，寫了感覺看起來若像足無聊......）