2019年5月24，台灣成做亞洲第一个同性兩人會當結婚的國家，台灣的文明、進步、民主、人權、自由，攏是世界it-tóo的，做一个台灣人，我感覺足驕傲的。
毋過，台灣這塊土地予幾若个政權thún-ta̍h過，咱的歷史佮文化面臨衰微以外，語言，嘛佇台灣現代化的過程中綴無著陣，致使有一寡新詞，毋管是新物仔、新觀念、新現象甚至新需求，不時會面臨無法度用台語表達的困境。
佳哉，有台語意識的人愈來愈濟，逐家同齊拍拚為台語創造新詞，佇網路抑是電視媒體出現。其中一个真熱、真烘(hang)的話題，就是同性婚姻。
包含台灣在內真濟所在的婚姻文化，有閣tsāi閣tsa̍t的父權結構，稱呼嘛是完全照這个結構來發展的，內家外家、仝姓無仝姓，牽涉血緣嘛關係財產，閣佮性別上的查埔查某有固定的對應。Tann若結婚的雙人攏查埔抑是攏查某，就完全無伊法──上基本的，新婦囝婿、大家大官、丈人丈姆，佇同性婚姻內欲按怎稱呼？
當頭對面咱干焦叫阿爸、阿母，大家、大官是「背稱」，就是佮別人講著這个人的時稱呼的方式，問題攏是出佇遮。網路上有看著『女媳』、『子婿』這款華語講法，各種稱呼攏有，基本原理就是佇原稱呼的核心成份頭前加上性別標記。唸起來袂順，嘛感覺無合咱台語的語感，而且理路並無行出性別框仔。
稱呼是對關係來的，新的稱呼，嘛著對新的關係重思考。同性愛人之間，並無娶「入來」抑是嫁「出去」的分別──上好異性婚姻嘛無。若是女性，兩爿的爸母攏加一个查某囝；若是男性，兩爿的爸母攏加一个後生。既然按呢，就應該無分大家／丈姆、大官／丈人，攏是爸母。
這个新關係建立佇「婚姻」。就法律來講，婚姻就是一種民事契約，契約就是人佮人之間的約束。毋是干焦佮財產有關係的代誌爾爾喔，「契」佇咱台語內底會用佇一个足重要的所在：契爸、契母、契（查某）囝。
台灣傳統對認契爸母是真慎重，毋是講講咧就準拄煞。通常有「捾水米」的儀式，象徵「有共你養飼」，嘛有人會拍金仔予契（查某）囝，甚至佇訃音頂，有食水米的義子、義女是佮後生查某囝排佇仝位階的。
講來，這嘛是一種約束：約束來做親人。照這个理路，「因為婚姻關係來成做親人」，嘛是一種約束。愛人仔的爸母就親像家己的契爸契母，精差佇這个「契」毋是別款「契」，是限定佇「因為婚姻關係產生的契」，所以會當簡稱做「婚契」。
按呢代誌就簡單矣。「加一个後生／查某囝」加上「婚契」的概念，所有同婚關係內底的背稱，攏會當就原本血親的叫法，佇頭前加一个「婚契」：婚契爸、婚契母、婚契囝、婚契查某囝、婚契大姊、婚契小弟......賰的就照樣畫鞋範
若是阮翁、阮某，會當照用，嘛會當改用「阮牽的」。若是『配偶』，因為是法律名詞，建議猶是直接唸「phuè-ngóo」就好，共當做外語來處理，畢竟法律條文並無台語版，毋過佇口語，會當使用咱在來的用語「頭對」。
「婚契」的用法閣有一个好處。雖然會當結婚、有法律地位，毋過社會上的氣氛、偏見，予真濟人毋敢、毋願予外人知，毋過總是會拄著抑是講著，無方便「出櫥*」的人，只要共「婚契」的「婚」省略、賰「契」就好矣，無欺騙、真自然。甚至佇訃音頂嘛是會當按呢處理。
這个邏輯，完全是對台語出發來思考的，若欲用佇華語，若像會拄著問題，這就留予華語人去操煩。
原來咱台語的骨髓內底，有對進步觀念的「超前部署(tshiau-tsiân-pōo-sú)」。
*出櫥：華語講『出櫃』，對英語Coming out of the closet(Coming out)來的，用台語講就是「行出衫仔櫥」，照台語的構詞，會當講做「出櫥」。