* 出擢(tshut-tioh)：傑出
* 許/許的(khóo/khóo--ê)：code/coder，程式碼/程式員，取材自「許功蓋」並諧音「許」，台語的「姓氏＋的」表示暱稱，「動作＋的」表示職業或身份。口語中建議直接說"coder"
* 拹/拹閣(hia̍p/hia̍p-koh)：hack/hacker，駭/黑客、駭客（台語的字面語意是鬆動/鬆動且又……）。口語中建議直接說"hacker"
12歲的時，唐鳳停學去寫「許(khóo, code)」；15歲，伊踮網路創業。這馬伊34歲，講家己是「保守的無政府主義者」、已經退休，當咧研發各種工具、平台，來重建民主制度。
伊講話幼聲，面模仔長㧣圓*，烏色的頭鬃摠咧袚佇頷頸後。伊一下行入來阮面會(biān-huē)的「共同工作空間」，隨共淺拖仔褪落來，佇椅仔頂疊環坐*。
做一个家己學起來的「許的(khóo--ê, coder)*」（12歲停學）、早期的創業者（15歲建置第一間公司），伊是一肢跤踏佇矽谷、一肢跤踏佇自由的網路世界大漢的。
生來是查埔囝，毋過伊佇2005年迒(hānn)性別嘛改名。退休兩年，今伊34歲來投身政治，目前下工夫咧研發各種對社會改革有幫贊的工具、平台。
下面是Rue98佮這个「公民拹閣(hia̍p-koh, hacker)*」面會的紀錄。
*長㧣圓：橢圓形
*疊環坐(thia̍p-khuân tsē)：盤腿坐
「我佇紙頂畫一台電腦」
唐鳳8歲的時，親像有的人愛讀冊佮畫圖，伊是痟程式設計：含(kânn)熱情佮好玄。
「我本底就愛數學，有一工佇厝裡無意中發現一寡仔程式設計的冊，我隨予內底的邏輯佮數理唌(siânn)著*。毋過彼時我無電腦，所以我佇紙頂畫一台。我共 boo-tán (button)揤落去，共電腦有可能輸出的內容寫落來。我tsua̋nn免用機器就學會曉程式設計。這予我真大的開破*：自彼陣開始，程式設計就成做一種思維的方式。」
無偌久，in爸母就共伊買一台真正的電腦。幾個月以後，伊寫出第一个應用程式：予in小弟的教育奕耍物*。
唐鳳毋是完全佇臺灣大漢的。伊的阿爸捌佇德國讀博士，研究天安門(Thian-an-bûn)學運，伊是佇1989年去北京的時，接觸著這个對伊產生重大影響的運動。
「我是佇社會運動者中央大漢的。In為著欲予民主程序進步，特別出力去抗爭。」
自細漢，唐鳳就四界搬徙：逐年攏會因為老爸的穡頭搬一改厝。
*唌(siânn)著：吸引、引誘
*開破(khui-phuà)：啟發、啟示。
*奕耍物(ī-sńg-mi̍h)：遊戲。（遊戲規則：奕耍規則）
一个足少年就家己學起來的創業者
1993年，唐鳳轉來台灣，彼年伊12歲。伊拄讀國中的時，Tim Bernes-Lee佮伊的團隊佇瑞士共全球資訊網來起基。這項發明到位，雄雄予這个本成就佇網際網路頂頭的少年，視野規个楦闊(hùn-khuah)*去，學校佮伊袂比得：
「有萬維網(web)了後，代誌隨就足明顯，我會當直接向研究人員學我想欲學的物件。若佇學校，愛十年才學會著！我接接(tsih-tsiap) *著的研究者攏足熱情。所以，共校長佮厝內的人請教了後，我停學矣。」
伊凊彩兩句話，若像這是世間上簡單的代誌。伊tsua̋nn無閣去學校。
後來，一切攏發展甲真緊，伊佮朋友建置公司，研發中文的搜揣引擎(ia̋n-jín)*。公司發展甲真緊真順序，Intel嘛投資這間少年公司：「這是網路公司的年代。彼時軟體工業佇臺灣猶無講真發展，阮予人真致重(tì-tāng)。」
*楦闊(hùn-khuah)：拓廣、開闊
*接接(tsih-tsiap)：接觸
*搜揣引擎(tshiau-tshuē-ia̋n-jín)：搜尋引擎
「我想欲回饋(huê-kuī)網路」
90年代的網路是予人樂暢的年代：一切攏拄開始，政府猶無啥咧插(tshap)，一切自治的夢想攏會當允准，唐鳳嘛真積極咧參與真濟網路社群。
「我對網路學著真濟，所以我想欲回饋網路。」
所以伊投身佇「開放源碼*」社群：
「阮規間公司攏是用Perl（一種程式語言）寫的，程式設計師之間定定互相『協作(hia̍p-tsok)』、鬥相共。當時阮已經咧想：按怎共這款拹作徙(suá)去社會？」
伊鬥相共程式設計的冊翻譯做中文，閣有共維基百科、自由網遮的專案中文化。
佇開源運動內底，伊發現「一个安全的空間，佇遮咱會當互相學習，毋是共阮的向望佮希望硬櫼(tsinn)*予別人，佇過程中阮學著物件，紲落來又閣轉來到遮……」
*開放源碼(khai-hòng guân-bé)：開放源碼，將程式碼等相關資源開放給所有人免費使用。
*硬櫼(ngē tsinn)：硬塞、強加
共識佮程式的政治
仝時間，伊發現網際網路工程任務組（IETF），一个工程師佮許的(coder)組成的團隊。雖然毋是正式的組織，煞來決定網際網路的發展佮建設。
IETF無正式的會員資格，只要參與就會當做會員。每一个人攏是自願參加，線頂的提案經過廣泛的討論了後，以 RFC「徵求意見書」的文件形式發佈協定。
團隊的座右銘是：「阮相信頗略仔的共識、硞硞傱*的程式。」
唐鳳講：「這是我第一改了解政治系統，一切攏互相關聯、互相配合。」
1997年，伊離開公司，轉做顧問（這時伊17歲）。伊犁頭戴鼎*咧讀哲學、社會學佮文學。伊想欲共「咱佇網路建立的虛造空間*內，出現的各種複雜行為」舞予清楚。
斯當時網際網路的特色——自治、合作佮信任集體智慧的模式——猶原是伊佇思考現時政策、建造對話佮達成共識的平台，真重要的工具：
「遮的價值佇過去二十年予我刺激，嘛培養我掌握科技的方法。」
影響大甲伊共家己看做是網際網路的「保守主義者」：
「我是保守的無政府主義者。這敢若真矛盾：無政府主義者定定佮『桃花源(utopia)』 牽做伙，若像是未來的理想世界。毋過我已經體驗這个桃花源二十幾冬矣：這就是我想欲維持的網路『按呢去(Anarchy)*』」。
*硞硞傱(kho̍k-kho̍k-tsông)：一直跑
*犁頭戴鼎(lê-thâu-tì-tiánn)：埋頭苦幹
*虛造空間(hi-tsō khong-kan)：虛擬空間
*按呢去(Anarchy)：安那其，無政府狀態
g0v: 開放資料
佇咧二十年的「矽谷式創業者正常生活」（「我開公司了後共賣去，閣開一間公司閣共賣去……」）了後，伊決定欲退休。彼時伊33歲。這予人驚一下目睭褫金金。伊解說講：「我只是共高等教育規个跳過，出社會20冬，就退休矣。你看，這無偌爾仔不可思議。」
伊那講，那像一个歡喜的囡仔按呢笑。
今(tann)伊轉來臺灣，繼續擔任一寡仔公司的顧問（蘋果公司在內），大部份是遠頭*的工課。大部份的時間，伊參與的專案佮政治真有關係。
這類專案的源頭，是臺灣政府佇2012年推出「經濟動能推升方案」影片的時陣開始的。對影片會當看著人民予（挂(kuì)佇in頭殼頂的）政策舞甲霧嗄嗄。
唐鳳回憶：
「這塊廣告的意思就是：『這對恁來講傷複雜，毋過免煩惱，相信阮、做就著矣。』──這真正足侮辱人。」
為著欲回應，「Hacker 15」團隊決定共政府的預算資料公開，使用清楚、好捌、齊整的方式，佇網路公開發佈。唐鳳佇兩個月後加入這陣人。in是g0v.tw「零時政府」。
這个名是對政府網站「.gov.tw」改變延伸來的。想欲揣政府部門相關的「開放資料」，干焦需要共網址內底的「o」改做「0」就會使。
*遠頭(hn̄g-thâu)：遠端
「閣貧惰閣會當參與，正港行動的實踐」
佇咧視覺化進前，著愛先「需見(su-kiàn, scan)*」量真大的資料。g0v呼籲「眾貿(tsìng-bāu, crowdsourcing)*」參與，毋過in著愛替參與者起造適合的平台：
「若準阮邀請逐家copy規頁的數字去Excel表內底，大約仔愛四分鐘。佇網際網路，這个時間傷長：人佇別位隨會當得著滿足，比論佇面冊『揤讚』抑是『分享』。袂當超過一分鐘：這是網路動員的限制。」
所以g0v的眾「拹閣(hia̍p-koh, hacker)」共「需見(su-kiàn, scan)*」了後的檔案切做足細足細、會當佇幾秒以內轉做「驗證碼」的小任務。為著鼓勵參與，in閣加囥算改器(sǹg-kái-khì)*佮進度條。
「干焦開五秒鐘，就真正會當齒盤*救國！簡單、有效閣趣味。這是『眾貿』的關鍵：毋管啥物時陣，只要有方法予逐家看著進度，就會當無暝無日耍到破關。」
政治獻金視覺化的專案，24點鐘就吸引超過9萬人參與。現時臺灣政府部門，像教育、勞動佮衛生等等部門的資料，攏有真濟種版本的「g0v」應用。所有的「許(khóo, code)」攏是開源的。
「若準專案證明講有效，阮嘛希望政府會當共伊敆入去。親像預算視覺化專案就予臺北市政府提去用，in拄宣佈講欲用佮g0v會合的形式來公佈預算資料。」
對線頂到線跤，g0v 是知識份子、運動者佮專業人士定期「拹閣爽(hia̍p-koh-sóng, hackathon)*」見面交流的空間。in嘛開放予初學者佮非專業人士：
「人想欲互相學習。in無一定關心背後的意識形態佮政治，毋過in是真正想欲互相學習。
*需見(su-kiàn)：scan，掃描，口語中建議直接說"scan"
*眾貿(tsìng-bāu)：crowdsourcing，眾包
*算改器(sǹg-kái-khì)：計數器
*齒盤(khì-puânn)：鍵盤
*拹閣爽(hia̍p-koh-sóng)：hackathon，黑客松
*拹閣爽(hia̍p-koh-sóng)：hackathon，黑客松
日頭花學運
紲落來，g0v拄著閣較會當直接投入政治的機會。
2014年春天，臺北學生占領街頭，反對立法院做伊通過佮中國的貿易條約，這个條約允准中國佇幾若个領域大量投資，毋過無經過適當的程序來討論，所以學生譴責(khiàn-tsik)失落民主佮中國強插(tshap)的風險。
3 月 18 ，學生佔領立法院。真緊，社交網路頂懸四界攏是組織動員的圖片，占領者共代表希望的日頭花提咧，當做in的標記。唐鳳隨投入學運，毋過毋是佇立法院內底：
「我紮網路器材去鬥安裝的時陣，干焦佇立法院內底一點鐘，佇遐寫twitter。佇立法院，有五个角度的攝影機(liap-iánn-ki)直直攝影、共影像隨放送出來，完全是「楚門的世界」！鏡頭下面所有的活動攏純然是表演佮儀式。實在的辯論、實在的行動，嘛仝時間佇立法院四箍圍仔的街頭進行。」
彼時，唐鳳無感覺伊應該做反政府的角色。伊有興趣的毋是去佔立法院，抑是表達家己的立場──是研發工具來予當咧形成的言論自由較通發展。
「阮佇運動現場開發的技術大部份是中立的：是提來鼓勵逐家溝通，按呢爾爾。阮有真強的網路中立價值。」
伊嘛加入起造http://g0v.today/ 網站的「拹閣(hacker)」團隊，共占領運動全部的言論攏隨共放送、記錄佮存檔（字幕嘛是「眾貿」產生的）。伊講遮的工具會當予共識沓沓仔形成：
「逐工，咱會當佇網站頂懸看著觀點足無仝款的人，按怎佇立法院四箍輾轉的街頭做伙生活。獨派、左派佮環境運動者……in袂焦(tsau)袂亂*、交流觀點，沓沓仔形成閣較連貫的共識。這个共識佇今年的選舉有反映出來。」
*袂焦(tsau)袂亂：不慌不忙
鏡頭前的學運
學運差不多是全程是鏡頭前咧進行。唐鳳建議團隊佇立法院外口牆圍鬥投影幕，轉播內場當咧進行的討論。四界攏有攝影機，予學運整體上行向冷靜：
「6萬人咧看，對約束警察佮示威者的行為有應效。有喝口號，有唱歌箍人來，毋過場面無亂去。」
3月25，50萬人日頭花提咧上街頭。隔500公尺就有大螢幕轉播現場的狀況：「這是力量的展現──公民的力量。」
政府宣佈條約袂簽矣以後，抗議者隨開始清理街仔路。
前Google員工成做政府頭人
唐鳳解說講：
「後來的政治形勢改變矣。人民開始要求政治愛採用民主審議的結果，毋是干焦投票佮官員決定就準算。」
綴尾的秋天選舉，新的tshuā頭人出現矣。首都臺北選出一个獨立參選的醫生做市長；新上任的行政院長是工程師出身，副院長嘛是一个工程師，佇Google食幾若冬的頭路；佇內閣內底，有一个政務委員捌tshuā領亞洲區的法務部門。
「這批新的政務官使用『占領者』的語言。in講：『恁講恁會當共立法院的破網補起來，這馬請證明予逐家看。』彼是紲落來阮一直咧做的代誌。」
對今年初開始，因為占領事件來覺醒，佮其他社會運動者拍拚維持的革命希望，所形成的氣氛下，唐鳳拚勢創造新港路，予公民的喝聲會當佇政治空間有應聲。
所以，受Cornell(康乃爾)大學的公民立法專案RegulationRoom來啟發，零時政府的眾專案貢獻起造參與民主的平台，予相關人士會當參與討論立法項目佮法規調整案。
「阮干焦討論『主要利益關係人是網路使用者』的議題。」
佇遮的討論內底（仝款有隨放送、錄影、文字紀錄……），唐鳳擔任主持人（「我已經退休，會當保持中立：我無利益關係」），予過程會當進行了有順序。
為著鼓勵逐家同齊討論較複雜的網路相關議題（Uber, Airbnb, Bitcoin），唐鳳嘛參與設計合用的審議系統：「這是一个做伙討論問題佮走揣答案的平台，毋是針對已經完成的方案講『好』抑是『毋好』。」
起造平台的出發點，是欲予人進行有建設性的討論。所有設計平台的策略，攏是為著欲予逐家加來討論──比論講為著予討論較利便、理路較好予人理解來設計的：
「人講的中央集權，定定毋是因為權利會集中佇法律制定者這爿，是因為拄來的人對理路熟似的程度，實在綴袂著制定法律的人。阮試看覓共這个過程空鬥榫：兩點鐘內，任何有興趣的人攏會當理解規个討論的理路。」
「予咱共真心話講出來」
伊敢有想欲投身佇傳統政治？
「絕對毋是！阮考慮的是別項選擇。阮毋是欲做甲完美──阮干焦需要比這馬有的閣較好的。」
一个平台閣一个平台，一个網站閣一个網站，伊為著予閣較有包容性、閣較開放、閣較有代表性佮閣較公正的民主，來到咱的社會，當咧拍拚奮鬥。
這款的主張，嘛有伊相應的價值向望：
「予咱共真心話講出來，予所有的人會當無禁無忌來表達家己的感情，一切言論審查，包括自我審查，攏是系統有欠點。「拒絕審查」本身，就是基進(ki-tsìn)的政治主張。」
伊佇生活中嘛堅持這个主張。唐鳳原底是查埔囝唐宗漢，這幾年，伊共性別迒過去：
「我是後類別(hiō-luī-pia̍t, post-genre)。佇性別的爭論中我無愛選一爿徛。毋是講我認為這个議題無重要，是我認為爭論袂當解決任何問題。」
唐鳳佇真濟方面，若像予咱看著未來的面貌：平和有人性、起造的工具共咱掜倚來毋是孤立、參與政策無共消費、予逐家較會對話佮合作毋是去爭論。
50年前，咱共這款人叫做「嬉皮(hi-phî,Hippies)」。現時，這款人是「拹閣(hia̍p-koh, hacker)」。
這款未來，予咱期待。