繼續做 Liz

 

有時仔我會想講，我是按怎會行到遮，若像咧觀察一條溪河按怎轉彎踅斡，水家己揣方向，無共我問。我無影偌愛做我ê工課，台語復振、推廣、研究、演講、教育、座談、寫會了袂盡ê計畫佮報告，我攏做有路來，嘛做了袂䆀，就一直做lueh。講起來，予人需要，是危險ê代誌，予你袂赴問家己欲抑毋。

講我無熱情嘛毋著，我毋是自頭就無感。較早有影不時會歡喜，揣著一个語源、推動一項政策、建立一套制度、創立一个專案、完成一項閣一項ê成果，足爽。後來tsia-ê爽快煞沓沓仔勼去、蔫去，追求變做責任，想欲變做著愛，成就感變做免洗箸，用過就無矣。無法度啊，啖過ê滋味，閣再食著就袂閣有驚喜。

講甲若像偌不得已，嘛毋是，曷無人逼我。我一面咧喝忝，一面閣毋願停。我uan-na會責備家己，哪會欲共家己燒甲賰火烌，袂輸若無夠忝無夠喘就毋知愛按怎坐按怎䖙。我嘛毋是完全無感覺啊，我知影我忝，這款忝毋是歇幾工仔就通恢復。伊若像交落枕ê痠抽疼，較深層ê筋就是挽袂著。

有時我會做寡仔代誌來挔柴添火，比論講，來共中學課本ê古文標文讀音，未來凡勢通鼓勵國文老師用台語教古文。結局就是，標兩句仔就共放leh。過去做著趣味ê台語工課，這馬若像干焦賰責任。

責任uan-na會使人麻痺，管待家己佮意抑無佮意。有時我感覺我若像「永動機」，內底有安責任感佮自我要求ê gí仔，時間若到就會紡。Eh，這凡勢嘛是一款性命力？只是運作ê所在無春天ê光景，其實夏秋冬嘛無，就是一个地下室。

跔佇地下室拍拚，其實我袂討厭，只是定定會𤺪。我知影家己會繼續做，袂逃走、袂擋恬、嘛袂真怨慼。袂使，愛有一个較正面ê結尾。無，按呢啦，來sip兩杯仔，看欲佇佗位鬥一个窗仔抑是深井，提醒家己不時看一下仔外口，佮人講人話，嘛予別人有應話ê機會。

袂牢鼎

 

我有平底 ê 生鍋（senn-ue，鑄鐵鍋），總是用生鍋足需要技術，溫度歹控制，加上自我搬來這馬ê住所，因為gá-suh管歹牽，只好用「電陶爐」（毋是IH爐），比gá-suh爐閣較歹控制溫度，致使我後來就較少用生鍋。

定定有人講有抹沿（buah-iân，塗層）ê 鼎傷身體。我最近愛換新 ê 平底鼎仔矣，閣去想著這个問題，拄好看著一个網衝總舖師（網紅主廚）咧講袂牢鼎（bē-tiâu-tiánn，不沾鍋） ê 智識，毋過看起來伊 ê 重點是破解袂牢鼎廣告ê一寡仔話術，比論講，「毋是生鍋、毋過是無抹沿 ê 袂牢鼎」，抑是「抹沿有濫鈦抑是啥看著足厲害 ê 金屬，所以傳熱度較好、材質較勇」，tsia-ê 攏毋是事實。

伊講，袂牢鼎kan-na有兩種原理：物理、抹沿。物理袂牢鼎，是利用生鍋抑是白鐵仔鼎加熱到一定ê溫度，表面會浮一沿薄薄ê空氣，這个時陣下一點油落去，就會形成一沿油膜予食材袂kiap；抹沿袂牢鼎，是佇鼎面抹鐵氟龍（the-hú-lóng）這類ê材料，伊ê性質會是磨擦力足低足低，嘛足僫得起化學反應，所以袂kiap。

我想欲了解 ê 重點是：有抹沿 ê 袂牢鼎，到底有傷身 ê 疑慮無？

佇過去，就是開始google，對萬千條訊息內底去撈我欲愛 ê 資料，這馬有Genimi就加足利便，我共我 ê 疑慮一件一件共問，叫伊揣資料，得著新 ê 資訊就閣就新資訊問落去。當然，伊揣 ê 資訊嘛有可能是錯誤 ê，網路頂就是有誠濟錯誤資訊mah，其實紙本冊嘛是啊，毋管是掀冊、用google抑是Genimi，最後攏是「你欲信啥」佮「你欲按怎判斷」。

我 ê 結論是：有毒 ê 是一種用來做鐵氟龍抹沿 ê 化合物PFOA，這馬多數國家攏禁止使用，現此時ê袂牢鼎，只要品牌有信用，基本上攏袂有毒性，只要注意uan-na袂當共空鼎放予熱傷久，莫予鼎 ê 溫度超過360度就好（通常我煎雞排抑是牛排極加是250度），若是抹沿開始有必巡、剾痕，就愛換鼎。舊鼎會使回收喔，伊ê金屬會當閣利用。

考慮安全性、省時間佮習慣，Tefal（Te-hóo）袂牢鼎猶是我 ê 首選。伊有兩个產地，法國本土做 ê 佮中國生產 ê，有要意 ê 人愛注意。仝款是平價ê系列商品當中，法國製ê當然有較貴一屑仔，有影一屑屑仔爾爾。若是你佮我仝款，較捷煮兩人份、需要煎佮炒，我個人推薦「火焰系列」28公分 ê 平底炒菜鼎（就是底是平ê、鼎身有懸度會使炒菜），法國製，Momo一跤賣799。古早我若像嘛用過「好食系列」，價數仝款。

（可惜我無流量無人揣我做業配）

補充，盈成共「塗層」翻做「糊重 kôo-tîng」(coating)，讚！

鍋貼

(圖片來源：八方雲集)

雖然我個人較佮意「長煎餃」這个名，毋過，共這个物件號做「鍋貼ko-tah」嘛誠適合，我欲來替伊講幾句仔話。

第一，

食物ê做法綴時間佮空間會有各種演變，至少佇臺灣，「鍋貼」佮「煎餃」是無仝物件。鍋貼是長liau形，雙爿袂lia̍p予密，會留空，對中國傳來臺灣；煎餃是水餃形，規个lia̍p密密，親像水餃落去煎，日本料理有這出，會淋麵粉水予伊下底有一沿赤赤ê皮，因為較立體、較密，食著較厚湯。這兩款物件佇華語有分，咱台語當然嘛毋好共濫濫做伙。

第二，

「鍋(ko)」字台語有teh用，像電鍋、火鍋；「貼(tah)」字台語當然嘛有teh用。共兩个台語口語有teh使用ê字構成一詞，真四常。紲落來看伊ê構詞，「鍋貼」是真特別ê「賓述結構」，就像米粉炒、豆乾糋、芋粿曲，閣拄好攏出現佇食ê。當然，米粉炒tsia-ê詞，賓語是食物、毋是器具，這點佮鍋貼無仝。我目前猶想袂著有啥「賓述結構」做名詞ê例，若有先進想著才補充。

第三，

這个食物是外來ê，共伊叫做「鍋貼」，uan-na會當呈現伊外來詞ê特色。教典都有收「饅頭(bán-thô)」矣leh，「鍋貼(ko-tah)」哪有偌特別（甚至欲共叫做kóo-the嘛會使）（無啦，kóo-the我個人感覺較無好）。

以上，是我認為鍋貼uan-na誠好ê理由。目前我猶是會長煎餃佮鍋貼濫teh講，觀察伊ê發展。若是兩个講法攏留落來嘛袂奇怪，孔明車、跤踏車、自轉車就是一个例。

Tshàu-su̍t-á

已經足濟年拄著音字ê代誌我攏慣勢激恬恬，因為過去冤kah足siān，佮人比時間冗剩咱絕對輸，尾仔就感覺「好啦你歡喜就好」（我按呢嘛是一種su̍t-á😅）。

這改這个較好解說，夯枷來喋一下。

「豎」音sū，原本ê意思就是徛leh、直直ê狀態。延伸到徛佇邊仔ê人>>小吏、下跤手人，才閣延伸到罵人，所以「豎子不足以謀」ê「豎」，是teh罵項羽「囡仔人無遠見」，毋是講伊無膽。按呢敢有可能閣延伸做無膽？我毋知，我無看著干證。

「術」音su̍t，原本ê意思是大路。因為人愛順路行，延伸出法令、閣延伸到策略、方法，閣延伸到技藝。技藝有好用途嘛有䆀用途（妖術、騙術就是䆀用途），台日單字「術」就已經有共人騙ê意思。台語內底共動詞加仔變名詞、名詞加仔變輕視ê例誠濟，延伸到「su̍t-á」嘛有伊ê理路。

兩字平平攏著愛延伸閣延伸才會當連結到「su̍t-á」，一个音袂合、一个音會合，欲選佗一个？當然是選音會合ê彼个。

伊敢有可能毋是漢語、無漢字？我感覺可能性較低，因為若是按呢，台日應該會收，台日無收，表示這个詞ê歷史可能無遐長。

當然咱知影，台日有可能有落勾、音韻演變有例外、詞源深閣僫揣證據，這款「牽涉詞源」ê見解攏是推論，無法度像科學實驗予你看著有變色抑是有tshìng煙，kan-na會使講，照證據來看，這个講法「較」合理。

好，來重現原文：

臭術仔！一點仔腳數都無！

Tshàu-su̍t-á! Tsi̍t-tiám-á kioh-siàu to bô!

（啊伊罵ê這句，嘛拄好呈現是按怎「跤」愛寫「跤」袂使寫「腳」，這是另外一條。）

讀1984台文版

 

使用弱勢母語創作文學，起頭論真是政治活動。若是停佇運動性，文學性佮語言層面無進化，雖然uan-na會當寫出偉大ê作品，總是，風格會有限制。

臺灣人全面hōng訓練kan-na用華文書寫ê期間，是臺灣進入現代化ê後半段，前半段ê語言文化，變做禁忌。致使，臺灣teh完成現代化ê時，大量智識、思維甚至美感體驗，多數來自華語。語言本身，當然是徛佇第一線、受華語影響上嚴重ê。

我對「文學」佮「翻譯」攏無夠了解毋敢加講話啦，是講1984台文版，佮別本文學譯作比較，會當討論ê話題加一項：台語本身。

咱台語界（若準有這个界）ê人看台文，攏足計較一件代誌：台語氣。發揮創意ê時敢有好好仔「保護」台語氣，若像是一个重要ê標準，是講台語氣到底是啥，逐家煞攏有無仝ê想像，「按呢傷華語」也變做一條奇怪ê線，袂輸你若迒過你就是中華語毒。另外一个定定用來做標準ê是「台日有收」，毋管彼个詞世間敢猶有人teh用，若像只要台日有收就無問題；閣有另外一个提醒是，台日有收，無表示使用ê人是對台日傳統學來ê、窮實是對華語入來ê。Uah，這款檢討，櫳闊來講，凡勢嘛是一種思想檢查？

講規晡猶未講著重點，因為我確實有影毋知欲講啥，猶閣亂亂仔

1984台文版，這兩、三年來有幾擺仔機會看著少部份ê內容，這馬已經有完整ê面貌，伊予我ê閱讀感受佮往過足無仝款。

第一項是譯者家己已經講過ê，這是一本共台語當做「正常語言」ê冊，所以你袂看著「語詞註解」tsit-lō物。國文課本掠外，佗一本華文冊有語序註解？無嘛，毋過逐本台文冊加減攏有語詞註解，因為煩惱讀者看無、因為台文作品本身就有掛教學使命……正常tik來講，咱看華文冊拄著袂曉ê字詞咱會按怎處理？查辭典、問人、用臆ê、共閬過。凡勢尾兩項上捷。毋是欲鼓勵逐家閬過啦，只是想欲指出這个事實。

第二項是詞彙量大增加。我那看那查辭典，當然教典絕對無夠，一定愛查台日。坦白講我ê台語詞彙量無講蓋濟，所以我定定愛查。我嘛知影有ê一定查無，因為我事先就知譯者家己創造足濟新詞來傳達各種幼路ê意思。內底有袂少台日有收、毋過現時較無人teh用ê古早詞，共tsia-ê詞抾轉來、甚至共當做新詞來學攏誠好。有這个前提，譯者創造ê新詞就「加足有正當性」（倒剾愛註明）。Tsia-ê新詞，有ê是共一个較大範圍ê概念分予較幼，抑是共一句描述用構詞ê手段組合出新ê概念、動作，整體來講，袂予人感覺「有創意」，是感覺「誠自然」，袂輸世間原底就有這个詞只是我毋知。

漢羅濫寫是目前台文書寫ê主流，只是選漢選羅無一致ê標準。用羅馬字ê大寫來強調彼ê詞，是真自然會當「遷徙」ê。這掠外，我毋知影是我想傷濟抑是譯者有影有這个意思：對故事人物來講，伊聽著ê內容猶未完全了解、抑是刁工欲表現對內容ê反對抑是無意識，就刁工用羅馬字表示。

整體來講，我認為這本譯作創造一種「台語書面語」ê風格。毋是倚文言ê彼款書面語，是佮現代華語誠無仝、閣毋是所謂「有台語氣」ê一種書面語風格，這種風格是透過舊詞新用、創造新詞、語序重組，加上Jiò-jì Óo-uī-ò(George Orwell)ê講事風格，共同形成ê。

小說內底「新講(newspeak)」ê概念誠重要，人類愛透過語言才會當思考，極權集團就借改造語言來限制人民ê思想佮思考方式，其中一項改造就是共詞彙量盡量刣減、語法盡量簡化，予人民「無才調」通犯思想罪。我感覺這本台文譯作是teh做顛倒反ê改造，改造一定會造成無適應，應該也會有批評，批評佮討論，會當予台語較有生湠、滋養ê能量。

逐家免著驚

 拜六陪 sia̋n-pái 參加 ê 講座，共野百合 kah 太陽花做歷史 ê 比較佮對照，誠有意義。1990 野百合30年矣，2014 日頭花10年矣，今仔日我竟然拄好聽著1991年 ê 「逐家免著驚」這條歌（原作是寫「大家免著驚」）。

對這條歌無熟 ê 人，先來看歌詞（**表示repeat）：

======

忠孝東路西對介壽大路遐

介壽大路公佇中正大廟埕

介壽大路口號按怎無開聲

中正大廟埕內逐家免著驚 **

有一个古早門城咧鐵枝路邊徛

當年隔壁阿本仔侵入就行佇遮

這馬交通鬧熱挾甲袂振動

恬恬毋敢喘氣孤單咧眠夢

這馬這个古城親像當咧變

愛靠臺灣同胞做主來表現

人人攏誠認真拍拚咧趁錢

但是城市敢有機會出頭天

**

有一个現代廟埕佇台北市鎮路

和尚王爺共阮燒甲花糊糊

朋友相招運動做伙來散步

燒香希望保庇萬歲好前途

這馬這个靈堂親像當咧變

愛靠臺灣同胞做主來表現

廟內廟外認真流汗沃土地

但是遊街敢著拚來廟埕坐

免著驚 驚就免

免著驚來 驚就會變

免著驚 驚就免

免著驚來 驚就會變

**

這个國家廟埕愈來愈奢颺

休閒抗議藝術相招來佔領

烏輪煙腸豆花踏入大廟埕

親像八仙過海來各展名聲

這馬這个世界親像當咧變

愛靠台灣同胞做主來表現

信女善男認真生存喝救命

但是廟埕敢會替咱來收驚

**

=====

這條歌原底是羅大佑作曲、林夕作詞 ê 廣東歌叫做「皇后大道東」，1991年羅大佑新專輯「原鄉」，李坤城共這條曲配台語詞，就是「逐家免著驚」，羅大佑佮林強合唱。內底有關「廟埕」鬧熱滾滾 ê 描述，應該就是因為野百合。彼時「凱達格蘭大道」猶是「介壽路」，介壽公 ê 廟埕第一改予臺灣人占領，後來，時代就無閣回頭一直向前行矣。

原鄉是我足愛 ê 專輯，李坤城共臺灣史寫做一條歌「原鄉」，有影厲害，第一條「火車」嘛足讚，kah 後面舒情歌「牽成阮 ê 愛」，攏是過去羅大佑作 ê 曲來填台語歌詞。

對「逐家免著驚」 ê 歌詞，會當有誠濟無仝角度 ê 體會，30年前 ê 台灣 kah tsit-má，若像足無仝款，毋過有 ê 代誌 koh 若像無啥進步。

野百合 ê 時我 iáu 毋知愛關心社會，日頭花 ê 時我已經毋是學生。猶原會記得當年逐工下班攏去青島東行行坐坐leh，人 teh 上班，心肝 teh 煩惱學生。

「這馬這个世界親像當咧變，愛靠台灣同胞做主來表現。」30年前 ê 勢，tann，iáu-koh 看袂著大路，臺灣，會行去佗位？台語，會活到當時？

台語新詞

有關台語新詞，最近又閣有一波討論，我嘛來 pn̄g 一下，說明這兩个工具：民間 ê 「iTagi」、公視台語台 ê 「台語新詞辭庫」。

「iTaigi 愛台語」是佇 g0v 萌典松(Bîng-tián-sóng)發展出來 ê 專案，2014年提案，2016年開始運作，提供一个新詞查詢佮交流 ê 平台，略仔類似台語版 ê Urban Dictionary。這个系統主要靠熱心 ê 工程師佮足濟台語人共同建立系統佮內容，無組織、無經費、參與者互相無一定熟似，完全是靠 g0v ê 精神佮方法建立 ê。這馬誠濟人利用伊來查台語詞，尤其是新詞。因為這款發展背景，所以伊 ê 資料無一定有公信力，毋過數量誠濟、充滿創造力。系統目前是意傳公司 teh 維護。

「台語新詞辭庫」是公視台語台受文化部委託執行 ê 專案，對新聞落手收集新詞，以創造新詞 ê 理論佮方法來翻譯新詞，上重要 ê 是，所有 ê 詞攏有經過一个委員會討論，成員包含老師、學者、台語主播，目前 ê 速度大約仔是一個月 50 條成果，而且毋但提供詞 ê 對譯，閣有例句、發音、相關新聞，因為有經過討論，所以較有公信力，當然目前詞 ê 數量無夠濟。

兩个網站 ê 連結攏囥佇留話，攏查有『輕軌』 ê 台語講法。

有關新詞佮標準，猶有別項需要討論 ê 議題，以後才閣分拆。