文白分用佇現代詞ê應用問題

台語ê文白音，有時仔有誠清楚ê分用功能，像「數」sòo佮siàu、「分」hun佮pun，意思無仝嘛袂使濫用。

有時仔是某一寡詞固定/慣勢用文白其中一音，佮口語書面語無一定有關係，像「開」，公開、開放用khai，開講嘛是khai；開門、拆開用khui，開戶嘛是khui。

有時仔是文白攏有人咧用，無意思ê分別嘛無固定ê用法，像「小(sió, siáu)說」、「公平(pîng, pênn)」、「校園(uân, hn̂g)」。

現代詞新觀念愈來愈濟、愈來愈幼，文白音有時仔會當用來做區分，誠利便，毋過有時仔，嘛會拄著「敢欲分用、按怎分」ê問題。

像「流」，只要佮流水（潮）有關ê所有OO流，攏用lâu；有具體液體ê，嘛用lâu；若氣體ê、抽象ê，就用liû，基本上是誠好分。

「值」ê文白音ti̍t、ta̍t，有老師主張文白分用，值班、當值ê意思用ti̍t，佮數字、價值有關ê用ta̍t。若是按呢分，數值、音值、比值、幣值、加值、現值攏是ta̍t。

嘛有老師主張干焦價值、值偌濟用ta̍t，賰ê攏用ti̍t，按呢數值、音值、比值是ti̍t，幣值、加值、現值是ta̍t。

第一種分法真有理、好解說，總是，若是去問對文白音概念無清楚ê台語人，就我問著ê，數字方面嘛是用ti̍t ê較濟。台語人ê語感誠重要，毋過，漢字偏旁ê影響是誠大，看著新ê詞，直覺唸ti̍t誠正常，無一定會佮字義有啥牽連。

另外一个例是「正念」。

這會使按呢想：tsiànn ê 倒反是啥？正爿/倒反、正的/歪的、正面/後面、正面/負面等等。

tsìng ê倒反是啥？正常、正當、正義......敢若無啥倒反概念，攏是佇頭前共加「無」。

若是數學ê「正數」佮「負數」咧？這組是新觀念，台日我揣無，較近代ê辭典是tsìng hū，就直覺來講我嘛會用tsìng。

按呢「正念」的正是啥意思？表面看起來就是正面負面ê正面，若按呢我會選tsiànn-liām。若是伊做一个研究領域抑是心理學方法無遐單純，甚至欲強調「毋是干焦正面遐簡單」，按呢共當做一个新ê專有名詞tsìng-liām，嘛有道理。這就愛參考領域專家ê意見。

相命

先品，這篇重點是台語，雖然台語佇足後面才會出現。

無經過印證嘛毋是啥研究方法，只是就我個人土想，相命會使分做四類：

第一，靈感，像降駕、通靈、感應，有ê需要儀式、工具，像童乩就是，碟仔仙這款ê應該嘛有算；有ê啥都毋免，目睭瞌leh就會當感應。第二，計算，像名姓、四柱、八字、紫微、羅經、七政四餘，tsia--ê攏佮數字有關係，愛算、愛推測。第三，相，就是看身體部位，我知影ê有面、手、跤，照形、皺痕、痣tsia--ê來論命。第四，卜，像戲文內底ê「抽靈籤卜聖卦」，閣有西洋ê塔羅牌，閣有利用動物抽牌，抑是物件ê形狀來分拆、預測。

有ê相命仙是會曉幾若項，算ê時是濫摻使用做伙考慮，像講，通常看名姓ê攏會參考八字，相這類ê嘛會參考生時日月。

相命ê有無仝目的，第一改算通常是論命解命，講你ê個性、人生ê起落、事業方向、都合、姻緣、災厄等等；有時是為著特別ê事件，像囡仔佮公司號名、改名、改運、看風水佮陽宅；閣有問事，像揣人、做各種決定、拄著歹物仔、預測未來tsia--ê。

最近無意中看著一个韓國ê節目，生存競爭彼款ê，比賽主題竟然是算命。參加ê人攏總49个，上濟ê是類似咱ê尪姨抑是仙姑這款ê，中文共翻譯做「巫師」，另外算四柱、名姓、看相、塔羅ê攏有。

按怎比leh？比論講，一个已經過身ê人，予逐家伊ê相片、名姓、生日，算伊ê「死因」；現場徛一个人，算伊「佗兩位」有動手術；現場徛5个人，算佗3个讀首爾大學。一對一對決，有互相共對方算命，嘛有兩个人現場共仝一个人算命。閣有團體賽，揣11對翁仔某，內底有5對有足濟个囡仔、另外6對完全無囡仔，算看是佗5對。評審手頭有「命運之書」，佮題目相關ê「事實」攏事先就寫佇遐，予評審來決定輸贏。

較早若看料理節目，看看leh攏會足想欲去食彼項物件，這改看相命節目，煞竟然予我雄雄足想欲算命。較早有去予人算過啦，少年時閣有一段時間家己看冊學紫微，閣有簡單ê塔羅。Tann已經到「年近半百」ê歲，嘛無啥通好算，毋過，因為心頭有一寡想法，感覺需要相命仙以我ê命格來開破，所以就開始揣佗位通相命。

這款代誌誠看緣份，結果緣份牽佇台語。揣是佇網路揣，看地點佮評論，其中有一位先生ê評論是「老師攏用台語，聽無ê人愛tshuā翻譯」。哇，竟然特別講是全台語相命，這毋是緣份是啥，我就決定欲去揣這位先生。

伊ê佛堂叫做「宇淨工作室」，佈置誠雅緻。我原本叫是會看著一位老先生，無想著講這位先生是青年女性（後來知影伊39歲），講話ê氣口小可仔大姊頭仔款，誠有氣魄。伊毋是論命彼款性質，較接近「問事」，是問較具體ê彼款問題，伊會就你ê名姓佮生日（免時辰）靠感應來回答你ê問題。

有影全台語喔！我那佮伊對話，職業病就那夯起來矣......泉腔，有ir 無 ere，毋過若像嘛毋是所有應該愛ir ê攏有ir，第2調變調有較懸毋過無遐明顯；Kan-na出現過一改「嗎」，毋過毋是「彼款中平調」，無出現過「吧」；雖然毋是彼款gâu講kah聽就欲有身矣，整體來講是誠順，予我誠享受。

問了以後，我實在袂忍得，問伊是佗位人，佇佗位大漢。伊小可仔頓蹬，無直接回答我，我共解說講是因為伊ê腔口，閣有台語講甲足輾轉，所以我想欲知影伊的背景。伊竟然共我講：「彼是神明毋是我，腔是神明ê腔。」伊進一步解說，因為神明講台語，神明ê腔較重，啊伊teh講tsia--ê代誌是靠神明，伊著愛用神明ê話才講會出來，講著才會順才會緊，退了後，講話ê速度就會較慢，平常時仔嘛是講華語為主。

後來伊領我去佛堂燒香，供奉ê是準禔佛母，叫我共佛母說謝，這个過程伊有影是攏講華語。

我心肝頭隨浮幾若个問題出來，燒香ê時攏是雜念：伊講ê神明毋是佛母啊，按呢是佗一尊？抑是有別項意思？先生佮伊ê神明敢有影會無仝腔？神明有腔口差無？敢有老漳ê神明？敢有可能靠田野ê聲音影像記錄分析眾神明ê腔口分佈？敢有人做過類似ê研究？

古早就知影家己無適合做田調，就是面皮傷薄啦，歹勢繼續問，kan-na想欲逃走，tsia--ê疑問只好暫時按下。

人講相命有心理諮商ê效果，我誠認同。若是拄好有人想欲問事，推薦全台語ê宇淨工作室，敲電話去就會使預約。本文毋是業配，先生ê本領我無評論，個人體會就好。

繼續做 Liz

 

有時仔我會想講，我是按怎會行到遮，若像咧觀察一條溪河按怎轉彎踅斡，水家己揣方向，無共我問。我無影偌愛做我ê工課，台語復振、推廣、研究、演講、教育、座談、寫會了袂盡ê計畫佮報告，我攏做有路來，嘛做了袂䆀，就一直做lueh。講起來，予人需要，是危險ê代誌，予你袂赴問家己欲抑毋。

講我無熱情嘛毋著，我毋是自頭就無感。較早有影不時會歡喜，揣著一个語源、推動一項政策、建立一套制度、創立一个專案、完成一項閣一項ê成果，足爽。後來tsia-ê爽快煞沓沓仔勼去、蔫去，追求變做責任，想欲變做著愛，成就感變做免洗箸，用過就無矣。無法度啊，啖過ê滋味，閣再食著就袂閣有驚喜。

講甲若像偌不得已，嘛毋是，曷無人逼我。我一面咧喝忝，一面閣毋願停。我uan-na會責備家己，哪會欲共家己燒甲賰火烌，袂輸若無夠忝無夠喘就毋知愛按怎坐按怎䖙。我嘛毋是完全無感覺啊，我知影我忝，這款忝毋是歇幾工仔就通恢復。伊若像交落枕ê痠抽疼，較深層ê筋就是挽袂著。

有時我會做寡仔代誌來挔柴添火，比論講，來共中學課本ê古文標文讀音，未來凡勢通鼓勵國文老師用台語教古文。結局就是，標兩句仔就共放leh。過去做著趣味ê台語工課，這馬若像干焦賰責任。

責任uan-na會使人麻痺，管待家己佮意抑無佮意。有時我感覺我若像「永動機」，內底有安責任感佮自我要求ê gí仔，時間若到就會紡。Eh，這凡勢嘛是一款性命力？只是運作ê所在無春天ê光景，其實夏秋冬嘛無，就是一个地下室。

跔佇地下室拍拚，其實我袂討厭，只是定定會𤺪。我知影家己會繼續做，袂逃走、袂擋恬、嘛袂真怨慼。袂使，愛有一个較正面ê結尾。無，按呢啦，來sip兩杯仔，看欲佇佗位鬥一个窗仔抑是深井，提醒家己不時看一下仔外口，佮人講人話，嘛予別人有應話ê機會。

袂牢鼎

 

我有平底 ê 生鍋（senn-ue，鑄鐵鍋），總是用生鍋足需要技術，溫度歹控制，加上自我搬來這馬ê住所，因為gá-suh管歹牽，只好用「電陶爐」（毋是IH爐），比gá-suh爐閣較歹控制溫度，致使我後來就較少用生鍋。

定定有人講有抹沿（buah-iân，塗層）ê 鼎傷身體。我最近愛換新 ê 平底鼎仔矣，閣去想著這个問題，拄好看著一个網衝總舖師（網紅主廚）咧講袂牢鼎（bē-tiâu-tiánn，不沾鍋） ê 智識，毋過看起來伊 ê 重點是破解袂牢鼎廣告ê一寡仔話術，比論講，「毋是生鍋、毋過是無抹沿 ê 袂牢鼎」，抑是「抹沿有濫鈦抑是啥看著足厲害 ê 金屬，所以傳熱度較好、材質較勇」，tsia-ê 攏毋是事實。

伊講，袂牢鼎kan-na有兩種原理：物理、抹沿。物理袂牢鼎，是利用生鍋抑是白鐵仔鼎加熱到一定ê溫度，表面會浮一沿薄薄ê空氣，這个時陣下一點油落去，就會形成一沿油膜予食材袂kiap；抹沿袂牢鼎，是佇鼎面抹鐵氟龍（the-hú-lóng）這類ê材料，伊ê性質會是磨擦力足低足低，嘛足僫得起化學反應，所以袂kiap。

我想欲了解 ê 重點是：有抹沿 ê 袂牢鼎，到底有傷身 ê 疑慮無？

佇過去，就是開始google，對萬千條訊息內底去撈我欲愛 ê 資料，這馬有Genimi就加足利便，我共我 ê 疑慮一件一件共問，叫伊揣資料，得著新 ê 資訊就閣就新資訊問落去。當然，伊揣 ê 資訊嘛有可能是錯誤 ê，網路頂就是有誠濟錯誤資訊mah，其實紙本冊嘛是啊，毋管是掀冊、用google抑是Genimi，最後攏是「你欲信啥」佮「你欲按怎判斷」。

我 ê 結論是：有毒 ê 是一種用來做鐵氟龍抹沿 ê 化合物PFOA，這馬多數國家攏禁止使用，現此時ê袂牢鼎，只要品牌有信用，基本上攏袂有毒性，只要注意uan-na袂當共空鼎放予熱傷久，莫予鼎 ê 溫度超過360度就好（通常我煎雞排抑是牛排極加是250度），若是抹沿開始有必巡、剾痕，就愛換鼎。舊鼎會使回收喔，伊ê金屬會當閣利用。

考慮安全性、省時間佮習慣，Tefal（Te-hóo）袂牢鼎猶是我 ê 首選。伊有兩个產地，法國本土做 ê 佮中國生產 ê，有要意 ê 人愛注意。仝款是平價ê系列商品當中，法國製ê當然有較貴一屑仔，有影一屑屑仔爾爾。若是你佮我仝款，較捷煮兩人份、需要煎佮炒，我個人推薦「火焰系列」28公分 ê 平底炒菜鼎（就是底是平ê、鼎身有懸度會使炒菜），法國製，Momo一跤賣799。古早我若像嘛用過「好食系列」，價數仝款。

（可惜我無流量無人揣我做業配）

補充，盈成共「塗層」翻做「糊重 kôo-tîng」(coating)，讚！

鍋貼

(圖片來源：八方雲集)

雖然我個人較佮意「長煎餃」這个名，毋過，共這个物件號做「鍋貼ko-tah」嘛誠適合，我欲來替伊講幾句仔話。

第一，

食物ê做法綴時間佮空間會有各種演變，至少佇臺灣，「鍋貼」佮「煎餃」是無仝物件。鍋貼是長liau形，雙爿袂lia̍p予密，會留空，對中國傳來臺灣；煎餃是水餃形，規个lia̍p密密，親像水餃落去煎，日本料理有這出，會淋麵粉水予伊下底有一沿赤赤ê皮，因為較立體、較密，食著較厚湯。這兩款物件佇華語有分，咱台語當然嘛毋好共濫濫做伙。

第二，

「鍋(ko)」字台語有teh用，像電鍋、火鍋；「貼(tah)」字台語當然嘛有teh用。共兩个台語口語有teh使用ê字構成一詞，真四常。紲落來看伊ê構詞，「鍋貼」是真特別ê「賓述結構」，就像米粉炒、豆乾糋、芋粿曲，閣拄好攏出現佇食ê。當然，米粉炒tsia-ê詞，賓語是食物、毋是器具，這點佮鍋貼無仝。我目前猶想袂著有啥「賓述結構」做名詞ê例，若有先進想著才補充。

第三，

這个食物是外來ê，共伊叫做「鍋貼」，uan-na會當呈現伊外來詞ê特色。教典都有收「饅頭(bán-thô)」矣leh，「鍋貼(ko-tah)」哪有偌特別（甚至欲共叫做kóo-the嘛會使）（無啦，kóo-the我個人感覺較無好）。

以上，是我認為鍋貼uan-na誠好ê理由。目前我猶是會長煎餃佮鍋貼濫teh講，觀察伊ê發展。若是兩个講法攏留落來嘛袂奇怪，孔明車、跤踏車、自轉車就是一个例。

Tshàu-su̍t-á

已經足濟年拄著音字ê代誌我攏慣勢激恬恬，因為過去冤kah足siān，佮人比時間冗剩咱絕對輸，尾仔就感覺「好啦你歡喜就好」（我按呢嘛是一種su̍t-á😅）。

這改這个較好解說，夯枷來喋一下。

「豎」音sū，原本ê意思就是徛leh、直直ê狀態。延伸到徛佇邊仔ê人>>小吏、下跤手人，才閣延伸到罵人，所以「豎子不足以謀」ê「豎」，是teh罵項羽「囡仔人無遠見」，毋是講伊無膽。按呢敢有可能閣延伸做無膽？我毋知，我無看著干證。

「術」音su̍t，原本ê意思是大路。因為人愛順路行，延伸出法令、閣延伸到策略、方法，閣延伸到技藝。技藝有好用途嘛有䆀用途（妖術、騙術就是䆀用途），台日單字「術」就已經有共人騙ê意思。台語內底共動詞加仔變名詞、名詞加仔變輕視ê例誠濟，延伸到「su̍t-á」嘛有伊ê理路。

兩字平平攏著愛延伸閣延伸才會當連結到「su̍t-á」，一个音袂合、一个音會合，欲選佗一个？當然是選音會合ê彼个。

伊敢有可能毋是漢語、無漢字？我感覺可能性較低，因為若是按呢，台日應該會收，台日無收，表示這个詞ê歷史可能無遐長。

當然咱知影，台日有可能有落勾、音韻演變有例外、詞源深閣僫揣證據，這款「牽涉詞源」ê見解攏是推論，無法度像科學實驗予你看著有變色抑是有tshìng煙，kan-na會使講，照證據來看，這个講法「較」合理。

好，來重現原文：

臭術仔！一點仔腳數都無！

Tshàu-su̍t-á! Tsi̍t-tiám-á kioh-siàu to bô!

（啊伊罵ê這句，嘛拄好呈現是按怎「跤」愛寫「跤」袂使寫「腳」，這是另外一條。）

讀1984台文版

 

使用弱勢母語創作文學，起頭論真是政治活動。若是停佇運動性，文學性佮語言層面無進化，雖然uan-na會當寫出偉大ê作品，總是，風格會有限制。

臺灣人全面hōng訓練kan-na用華文書寫ê期間，是臺灣進入現代化ê後半段，前半段ê語言文化，變做禁忌。致使，臺灣teh完成現代化ê時，大量智識、思維甚至美感體驗，多數來自華語。語言本身，當然是徛佇第一線、受華語影響上嚴重ê。

我對「文學」佮「翻譯」攏無夠了解毋敢加講話啦，是講1984台文版，佮別本文學譯作比較，會當討論ê話題加一項：台語本身。

咱台語界（若準有這个界）ê人看台文，攏足計較一件代誌：台語氣。發揮創意ê時敢有好好仔「保護」台語氣，若像是一个重要ê標準，是講台語氣到底是啥，逐家煞攏有無仝ê想像，「按呢傷華語」也變做一條奇怪ê線，袂輸你若迒過你就是中華語毒。另外一个定定用來做標準ê是「台日有收」，毋管彼个詞世間敢猶有人teh用，若像只要台日有收就無問題；閣有另外一个提醒是，台日有收，無表示使用ê人是對台日傳統學來ê、窮實是對華語入來ê。Uah，這款檢討，櫳闊來講，凡勢嘛是一種思想檢查？

講規晡猶未講著重點，因為我確實有影毋知欲講啥，猶閣亂亂仔

1984台文版，這兩、三年來有幾擺仔機會看著少部份ê內容，這馬已經有完整ê面貌，伊予我ê閱讀感受佮往過足無仝款。

第一項是譯者家己已經講過ê，這是一本共台語當做「正常語言」ê冊，所以你袂看著「語詞註解」tsit-lō物。國文課本掠外，佗一本華文冊有語序註解？無嘛，毋過逐本台文冊加減攏有語詞註解，因為煩惱讀者看無、因為台文作品本身就有掛教學使命……正常tik來講，咱看華文冊拄著袂曉ê字詞咱會按怎處理？查辭典、問人、用臆ê、共閬過。凡勢尾兩項上捷。毋是欲鼓勵逐家閬過啦，只是想欲指出這个事實。

第二項是詞彙量大增加。我那看那查辭典，當然教典絕對無夠，一定愛查台日。坦白講我ê台語詞彙量無講蓋濟，所以我定定愛查。我嘛知影有ê一定查無，因為我事先就知譯者家己創造足濟新詞來傳達各種幼路ê意思。內底有袂少台日有收、毋過現時較無人teh用ê古早詞，共tsia-ê詞抾轉來、甚至共當做新詞來學攏誠好。有這个前提，譯者創造ê新詞就「加足有正當性」（倒剾愛註明）。Tsia-ê新詞，有ê是共一个較大範圍ê概念分予較幼，抑是共一句描述用構詞ê手段組合出新ê概念、動作，整體來講，袂予人感覺「有創意」，是感覺「誠自然」，袂輸世間原底就有這个詞只是我毋知。

漢羅濫寫是目前台文書寫ê主流，只是選漢選羅無一致ê標準。用羅馬字ê大寫來強調彼ê詞，是真自然會當「遷徙」ê。這掠外，我毋知影是我想傷濟抑是譯者有影有這个意思：對故事人物來講，伊聽著ê內容猶未完全了解、抑是刁工欲表現對內容ê反對抑是無意識，就刁工用羅馬字表示。

整體來講，我認為這本譯作創造一種「台語書面語」ê風格。毋是倚文言ê彼款書面語，是佮現代華語誠無仝、閣毋是所謂「有台語氣」ê一種書面語風格，這種風格是透過舊詞新用、創造新詞、語序重組，加上Jiò-jì Óo-uī-ò(George Orwell)ê講事風格，共同形成ê。

小說內底「新講(newspeak)」ê概念誠重要，人類愛透過語言才會當思考，極權集團就借改造語言來限制人民ê思想佮思考方式，其中一項改造就是共詞彙量盡量刣減、語法盡量簡化，予人民「無才調」通犯思想罪。我感覺這本台文譯作是teh做顛倒反ê改造，改造一定會造成無適應，應該也會有批評，批評佮討論，會當予台語較有生湠、滋養ê能量。