離島本土語研究參訪：金門2

 

金門水庫太湖佮金門農工

金門第二工，資訊量爆炸，有足濟代誌值得記錄，毋過若攏寫我明仔載會傷忝，畢竟下暗已經體驗「金門酒令」，啉比昨昏閣較濟，所以我先寫這兩工 teh 思考 ê 問題，賰 ê 就「suán 矣」。

===
「國族認同」佇一寡仔所在，國家認同佮族群認同愛分開看。所謂 ê 「臺澎金馬」，臺灣澎湖有共同 ê 歷史經驗佮記持，毋過金門、馬祖佮臺灣開始有共同 ê 歷史經驗是1949年以後，而且這个歷史經驗內涵差足濟，文化基礎無仝免講，閣因為受著戰爭 ê 影響，連現代常民文化都佮臺灣都有誠大 ê 差別。

我毋知影金門人 ê 國家認同分佈按怎，毋過 in ê 族群認同絕對毋是臺灣，是閩南。政體佮族群本來就是兩回事，毋是一對一，這誠四常，毋過，這款認同絕對會影響語言名稱 ê 選擇。

講較白 leh，臺灣建國 ê 時，國家藍圖敢有金門馬祖？應該是有，按呢，金馬佮臺澎 ê 關係，是一个國家、抑是類似聯邦？抑是自治區？這款政治上 ê 定位，會決定語言政策，嘛會影響「國家語言 ê 語言名稱」。閣講較白 leh，「臺灣」兩字，就是袂當囥佇金門 ê 任何語言文化名稱頂面，就準學理上，金門腔佮臺灣 ê 誠濟所在無差甲遐濟。毋過，語言政策、語言名稱，本來就毋是單純 ê 學術問題，閣較是政治問題。

金門人無感覺著愛有家己專屬 ê 課綱，in 顛倒是感覺金門愛共課綱在地化。我嘛贊同莫閣生一个課綱出來。毋過若按呢，著愛處理「課綱科目名稱」 ê 問題，講白話就是：臺灣、澎湖、金門共同使用 ê 「本土語言課綱」，科目名稱愛叫做啥？疊一个臺灣，金門人無法度接受，無臺灣，臺灣人無法度接受，按呢欲怎樣處理？

寫到遮，我雄雄想著，「閩南」進前 ê 共同體概念是啥？抑是講，「閩南」這个共同體，是因為有閩南這个詞才開始有 ê ？若是按呢，歷史誠短 neh，毋知敢有人做「閩南族群認同研究」，應該是誠困難 ê 題目。
===

賰 ê 簡單記：

1.直播共學足歹申請，國教署若像足無想欲予人申請，而且效果無好。高中認為「遠距教學」計畫 ê 效果比直播共學較好，毋過這愛寫計畫、愛核銷，行政上較費氣。所以若是行政程序簡化，遠距教學會當解決 in 這馬欠師資 ê 問題。

2.毋知是高中對政策較會配合，抑是金門較袂像臺灣 ê 學校遐 gâu 想空想縫，in 其實攏願意配合政策，毋過咱做政策定定是「臺北看天下」，重「防弊」、無重「興利」，致使有 ê 規定顛倒予學校感覺纏跤絆手。我這馬感覺，會軁鑽 ê 就予 in 去軁鑽啦，有想欲好好仔做 ê 學校，比 kan-na 想欲應付 ê 學校較重要，咱做政策愛去顧 tsia-ê 學校、考慮 in ê 需求才著。

3.本土語對高職排課有影足困擾，這絕對是118課綱修訂重點。

4.金門 ê 酒令看起來驚人，毋過其實誠重視公平，誠有意思。想袂到酒啉啉leh，煞現場加一項工課，我又閣欲來發揮「台語hub」 ê 專長矣，先莫講，若是有成果，我才翻頭來講故事。

圖：金門水庫太湖，佮佇湖邊 ê 金門農工，海邊 ê 學校我看幾若間矣，大湖邊 ê 學校是第一改看，閣有鸕鶿 teh 飛，有影足媠。