澎湖權算是熱身，這改參與 ê 計畫，重點是金門。來進前已經有做心理建設，可能會萬千感慨，來了後，有影是萬千感慨。
第一站是烈嶼 ( Le̍h-sīr ) ê 一間國小，佮澎湖無仝款，阮佇入去到本土語言課教室進前聽無一句金門話（or 閩南語），逐家攏講華語。觀課 ê 時，發現學生無啥會曉講，甚至聽無啥有，老師講 in 佇厝內若像嘛無啥咧講，因為有時仔問囡仔講，某乜物件恁兜按怎講，學生定定講無聽過。
聽 in 講，少年家長對本土語言課程無要無緊，感覺 in ê 囡仔佮阿公阿媽講「國語」就好，課程時數無需要增加，毋過嘛是愛有啦，猶是希望囡仔略仔會曉，所以較傾向社團抑是課外來補充。對外島、小校來講，師資有影是誠大 ê 問題，in 感覺，較有熱情、較投入 ê 本土語老師，大部份是臺灣來 ê，閣足鼓勵學生愛保留金門腔。
第二站是本島一間學校 ê 國中班，學生數量袂少，分組介紹金門 ê 特色，老師竟然予 in 查教典看 in 寫 ê 詞按怎唸，而且看起來至少一半以上 ê 學生攏會曉查neh！害我感動甲，看著有學生無啥會曉用，足想欲落去鬥教。
課後 ê 座談，逐家對老師攏誠呵咾，我感覺今仔日兩位老師攏是早起 in 講 ê 「對臺灣來ê老師較有（對本土語 ê）熱情」彼款。這點予我感覺誠趣味，看起來，這是「語言意識」 ê 影響，臺灣這幾年提倡母語，應該是有社會效果。
啊校長共老師呵咾了，就請老師毋通使用「台語」這个詞，因為台語毋是金門話，金門話嘛毋是閩南語，按呢學生會『困惑』
（毋過伊認為用「閩南語」較好，免用金門話）。一位發言者講，老師攏無共學生糾正，按呢足好，因為徛佇教育方法 ê 立場，糾正會予學生無願意開喙。
後來經過別位研究員補充，我想伊 ê 意思是，佇本土語文課，態度比能力加真重要，所以老師 ê 教學策略針對態度、莫針對能力，按呢誠好（好啦恁好就好），伊閣講，定定有家長共伊反應，囡仔本來會曉講金門話，佇學校學學咧顛倒袂曉講（失禮我無想欲應矣......）。
整體來講，佇語言名稱，第一工拄著 ê 金門在地人完全無法度接受任何有「臺灣」兩字 ê 名稱，in 無認為家己是「金門腔」，應該是閩南語、是金門話；若這兩个來選，我感覺是一半一半，而且頭起先強調「金門話」 ê 人，言語之中，我感覺 in 猶是較想欲叫做閩南語。
實際上聽著金門腔，有影就是腔 ê 差別，當然有一寡仔詞彙 ê 用法、構詞佮臺灣優勢腔無仝，毋過音系基本上就是海線老泉腔。總是，以社會語言學 ê 角度來看，語言名稱毋是學術問題，是族群認同佮政治勢力 ê 問題，啊這講落去會變做論文，今仔日嘛無適合做結論，後面閣有三工咧，以後才講。
暗時是大人食飯，我本來想欲恬恬仔 thui 就好，毋過，一來，遮是金門，食飯 a̍h 有無啉 ê，二來，現任大頭家原來佇金門足有人面，家己嘛興啉，每一个攏點有著名，閣因為阮這逝就是欲來調查台語/金門話/閩南語 ê 問題，話題自然就一直箍佇遮。啊現任大頭家是會講「請裁」、會講伊知影彙音寶鑑 ê 彼款中年男性官長，我想這款形容，佇箍仔內行踏過 ê 人攏會理解啦，所以 honnh，就演變做我一直咧應喙應舌兼 thuh-tshàu ê 局面......
佳哉我嘛算會啉，加敬兩杯仔，共官長尊存一下，講一下仔自我消遣 ê 笑詼，應該是無代誌......啦。
沒有留言:
張貼留言