離島本土語研究參訪：澎湖2

澎湖出差第 2 工，仝款愛來寫紀錄，仝款亂亂仔。今仔日主要佇佮「鳥嶼」仝腔、佮馬公無隔海、佇地理上較倚近 ê 白沙國中，當地地名是「赤崁」，uan-na 是漳腔區。毋過參與座談 ê 有馬公佮湖西來 ê 校長，腔口較多元。

全澎湖 ê 國小佮大部份 ê 國中攏使用縣編本 ê 台語教材，主音讀是馬公腔，偏泉（同安）以外，o/oo無分，一律用 ”o” 標注（音值我聽起來是較接近 ɔ），較特別 ê 是有 j- 頭。

這兩工一直對照洪老師 ê 地圖，有夠實用，予我對澎湖「腔口透濫」 ê 理解，對「印象」變具體。過去咱會強調愛尊重各地方 ê 腔口，同時強調腔口有系統性。今仔日一位校長有特別講著「腔口透濫」 ê 問題，伊 ê 意思若像是，佇語文競賽講純 ê 澎湖腔顛倒較有利，毋過若是「有透濫」，就變做是欠點。

我耳仔聽伊按呢講，目睭看白沙鄉方言地圖，雄雄意識著講，咱咧講腔口系統性 ê 時，敢有影攏對系統遐爾熟、遐爾有把握、到會當判斷所有系統 ê 程度？至少我無，混合腔混合 ê 歷程佮混合 ê 程度，你欲按怎掠一个標準講 tse 是自來就按呢、he是受影響透濫？

（這个問題閣寫落去會寫袂了，先按下）
====

欲來講語言名稱。印象中，當年來辦語發法公聽會 ê 時，就感覺澎湖場是7場內底上特別、上尊重「國語」 ê 所在。這改對語言名稱 ê 看法我感覺是按呢：逐家對「台語」這个名稱感覺「理所當然」、對「閩南語」這个名稱感覺「無問題」，這兩个名稱同時存在是完全袂礙虐、袂 ke̍h 嘛欲 khê，甚至有一位校長認為會當像生物名稱仝款，閩南語是學名、台語是俗名。

哇，我一時毋知欲按怎去理解。我過去 ê 重點較囥佇「選佗一个」，有影較無去思考「兩个名用佇無仝語境」，當然我個人無贊成，總是，猶是愛去理解這款脈絡佮心理。
===

想欲轉來講腔口佇教學現場 ê 問題，毋過我頭殼閣開始咧疼矣，先簡單記一个我個人 ê 結論：腔口差 ê 問題傷過複雜，若欲落實佇教學現場，應該是會當發展一套簡化 ê 「方法」，毋是共「系統」簡化，是發展「方法」，予現場教師利用方法去操作。初步土想應該是做會到，仝款先按下。
===

下晡觀課有影無力寫矣，暗頓歐校長請阮食一間特別 ê 餐廳，有夠腥臊閣有影 gâu 料理，仝款無才調記矣。

欲暗仔我家己去揣廟，lè-táu ê 清水祖師廟佮典雅 ê 文澳城隍廟，攏誠媠，可惜時間有較晏，城隍廟廟門關起來矣，袂當入去參拜，kan-na 佇外口翕相，就用這張相來煞尾。