離島本土語研究參訪：澎湖1

鳥嶼國小後尾門

來過澎湖幾若改，毋過「鳥嶼(Tsiáu-sī)」這个所在我毋捌行跤到，這幾工佇澎湖出差，第一个行程就是鳥嶼國小。

臺灣本島對澎湖 ê 印象是偏泉腔，因為咱（可能是我啦）較知影馬公，啊湖西這个老泉腔因為誠特別嘛會較有印象。鳥嶼屬白沙鄉，白沙有誠濟漳腔區，甚至老漳島 neh，我就無了解囉。

雖然我有家己走去廟口想欲聽老大人講話，毋過 in 離我有較遠，我嘛歹勢去 lā-le，無聽著我想欲聽 ê 重點。鳥嶼福德寺是全臺灣第二大間 ê 土地公廟，是講，港口 ê 大廟，竟然是拜土地公（閣有千歲、將軍佮一位夫人是陪神），有影誠特別，毋知是啥因端。

示範教學 ê 老師，少年閣優秀，台語好、閣 gâu 教，學生 kan-na 兩个嘛攏袂冷場 neh，見問見有應。上特別 ê 是，澎湖所有學校 ê 台語課攏用縣自編 ê 教材，課文內容是當地素材以外，課文主音是馬公腔，也就是較倚同安腔，啊第2調變調是高升。毋過鳥嶼是老漳腔啊，老師講義寫「馬公優勢腔」、對比鳥嶼 ê 腔，予我感覺足心適，因為若是鳥嶼 ê 囡仔去考認證，in 顛倒才是優勢咧。（凡勢 kan-na 同行知影是佗位咧心適）

===

焦點座談有三位家長，第一个問題問 in NL4應該叫做啥語言，其中兩位袂輸我咧問啥白痴問題應講「台語啊」，第3位講，伊感覺叫「閩南語」較「體面」（伊真正用「體面」！），台語較親切。

三位攏感覺學校愛加講寡台語。其中一位家長講，因為伊 ê 囡仔自細漢攏講台語，去幼兒園，老師講華語煞聽無，老二出世伊才加減先教伊華語，毋過伊認為應該是學校愛有台語 ê 環境才著。我問伊講：「恁兜是有意識按呢咧做，抑是自然就按呢？」伊閣用「你咧講啥痟話」 ê 表情講：「自然就按呢啊，阮兜就是一直講台語，厝內免教國語啦，去學校就會曉講矣，毋過學校愛有較濟台語予囡仔適應。」伊閣補充：「會曉講台語足重要啊，無你欲按怎佮序大講話，加會曉一種語言就是加一種能力啊。」

這位媽媽，你用「這款代誌是常識」 ê 口氣佮表情講 tsia-ê 話，我有偌感動你知無！天龍國佮假天龍國是咧按怎啦！

===

忝規工，搧海風，閣小可仔感著，暗時閣開一場會議，本來會議煞鼓欲睏矣，毋過足驚見無寫落來明仔載就袂記得矣，所以就躼躼長無組織烏白記記咧。明仔載繼續。