征露丸

治療落屎 ê 家庭常備良藥「正露丸」，臺灣民間一般共叫做「臭藥丸仔」，有食過 ê 人就袂感覺這个名有啥奇怪。上古早伊其實是叫做「征露丸」，日本軍醫為著欲處理兵仔佇相戰期間因為水無清氣直直落屎 ê 問題，發明一種真有效 ê 藥仔，佇「日俄戰爭」出征露西亞(Lōo-se-a) ê 時予兵仔服用，因此號名叫做「忠勇征露丸」。

二戰了後，日本國內對軍國主義有各種檢討，影響誠深。1949年，大幸藥品會社共改名做「中島正露丸」，1954年正式以「正露丸」申請商標佇市場賣，閣有發生註冊商標 ê 爭議（中島是藥商名，佮商標爭議有關係）。

照臺羅 ê 規則，專有名詞第一个字母愛大寫。「臭藥丸仔」敢有算是專有名詞？雖然是特定 ê 藥仔名，因為是俗稱，所以教典無共標大寫。按呢，「征露丸」應該愛按怎處理咧？雖然這馬伊號做「正露丸」，毋過口語內底較捷聽著唸 ”tsing”，顛倒較無人講 ”tsìng”（無，就是講臭藥丸仔，嘛有人講 Sè-lōo-uân，是取日語發音），毋過，嘛毋是逐个人攏知影「露」是指露西亞，而且就頂面 ê 解說，凡勢藥廠佮日本社會嘛希望莫強調伊 ê 原意。

以下是4種標法代表 ê 意思：

1) Tsing-Lōo-uân：藥品專有名詞、露西亞意思留leh

2) Tsing-lōo-uân：規个當做藥品專有名詞、莫突顯來源

3) tsing-Lōo-uân：無共當做專有名詞、露西亞意思留leh

4) tsing-lōo-uân：無共當做專有名詞、嘛莫突顯來源

我個人是認為1) Tsing-Lōo-uân ê 標法上適當，畢竟伊已經是一个歷史名詞，就照歷史上 ê 原意標示；若是伊這馬 ê 正式名稱「正露丸」，就標做 Tsìng-lōo-uân 就好。

符號佮體例會當傳達誠濟深層 ê 意思，嘛佮構詞、名稱仝款影響咱 ê 思考方式。管待有人猶 teh 遐那獨那反台語，事實是，台語 ê 發展已經愈來愈成熟，著愛佮正常 ê 語言仝款，認真看待各種幼路 ê 問題。