感謝學妹邀請，昨昏有機會通參加「台灣事實查核中心」辦 ê 特映會佮論壇，看2021年 Noo-pé-luh 和平獎得主 Maria Ressa ê 紀錄片「A Thousand Cuts」。Ressa 是菲律賓 ê 資深記者，創辦網路媒體 Rappler，因為時常批評杜特蒂政權受著政府迫害，嘛因為社群網路（其實就是FB）ê 操作受著暴力佮死亡 ê 威脅，毋過伊佮同事攏堅持追求真相，一直到這馬，攏無脫離危險。
有關 Ressa ê 故事、菲律賓 ê 政治環境、杜特蒂 ê 言論佮統治手段等等，網路有誠濟資料，我就無閣加講。影片本身予我感覺誠恐怖，雖然講，臺灣 ê 新聞自由度是世界排頭前 ê，毋過透過影片，我猶是佇菲律賓社會看著臺灣隱形 ê 危機。
國會議員是限制杜特蒂權力 ê 防線，影片 ê 時間線就是這改選舉前後。其中一个候選人原本是矯正局局長（管監獄 ê），伊公開講伊願意為總統去刣人（笑笑仔講，毋是講笑），伊會佇造勢場唱歌、請人跳舞、騎重機遊街，唯一 ê 政見就是支持杜特蒂，民眾煞攏愛伊愛 kah，當然最後嘛高票當選。
菲律賓使用 FB ê 人口有 97%，所以佇 FB ê 操作，對民眾有足大 ê 影響力，煽動、激化、仇恨、謠言、抹烏、網軍等等，攏足嚴重，予 Ressa 佮 in 同事受著 ê 威脅，會對網路轉移到現實世界。
以上 tsia--ê，講起來，臺灣社會 uan-na 有仝症頭，只是程度無 hiah 嚴重——毋過 he 是這馬，未來 leh？社會上 hiah 濟反智 ê 言論，啥人敢保證未來會怎樣？
民主制度就是 hiah-nī-á 虛荏，需要一直共保護。Ressa 講，足濟傷害看起來無蓋嚴重，毋過，一个仔一个空喙、一條仔一條傷痕，累積起來，會共虛荏 ê 民主制度千刀萬剮(kuánn)、凌遲 kah 死。片名 A Thousand Cuts 就是這个意思。
映後 ê 論壇，請 5 位講者來分享，誠精彩，內容佇新聞稿內底有，有興趣 ê 人會當去看。
沒有留言:
張貼留言