[舊文] 討論「國語注音符號」（台文書寫附註解）

2015/4/25 舊文

我實在無理解，是按怎講著拼音，逐家攏會「理智相拍電[1]」，毋但是台語，講著「國語注音符號（以下簡稱注音）」嘛是仝款。會寫這篇文章是因為這篇：http://www.thinkingtaiwan.com/content/3980

先品[2]，我無反對注音，對我來講伊是一套符號，只要是符號，就會有優點佮欠點，羅馬字嘛是仝款，所以我嘛無認為一定愛用注音，對我來講這是「選擇」毋是「是非」。

先講注音的優點。注音是完全針對華語設計的符號，對華語來講真合軀[3]；聲母、介音、韻母分甲真明，對漢語鬥句[4]的需求來講較直覺；因為「韻母」的設計，教注音毋免順紲[5]教語音觀念（當然有人會認為這是欠點，愛看咱對拼音教育的期待是啥物）；閣來是目前台灣的教育是用注音。

注音的優點差不多就是羅馬拼音較欠的，注音的欠點，有的是羅馬字的優點（比論講羅馬字本身就是拼音文字，較適合做拼音的符號，閣有通用性，而且全世界學中文的人大部份攏用漢拼），有的是伊本身的雙面刀（比論講學這套符號干焦華語會使用，無夠經濟）。

以上攏有人講過矣，我想欲舉幾个定定聽著、對我來講值得討論的。

1.注音符號是咱的「根本」，廢注音就是消滅中華文化。

好啊，咱來講中華文化。注音自發明、改良、頒佈到今，毋才百捅年[6]，漢語歷史有偌長？「用符號注音」本底就是新觀念，佮中華文化無底代。若真正欲佇語言上「復興中華文化」，按呢咱來用反切、用韻圖，工具攏便便[7]喔。

2.「通用拼音」是台灣人的拼音，咱愛有主體性。

先說明，佇台灣的「羅馬拼音」有「教會羅馬字」佮「通用拼音」，是無仝款的物件。

我轉的這篇文章內底嘛共「通用」佮「台灣意識」做連結、共「漢語拼音」佮「傾中」做連結，各位朋友，這真正是天大地大的誤會，民進黨嘛無語言專家，in當初是揣毋著人。

欲講「有台灣意識的羅馬字」，嘛是教會羅馬字，毋是通用，通用的問題一大捾[8]，遮先莫講。（用教會羅馬字寫台灣語言的歷史，比注音是加真長）

3.注音嘛會使標台語，學注音就好矣。

確實有一套「方音符號系統」，毋過，毋免講到「意識形態」的層次，單純就符號來講就好，因為華語佮台語有足濟音無仝，為著欲拼台語，佇原本的注音符號以外，愛閣加幾若个新的符號，袂較好教，嘛袂較好學，閣有數位化這關（最近有人咧解決矣）。

4.所以講，學羅馬字就好，連台語、客語、南島語攏會當用。

這嘛是簡化的講法，因為每一个語言所用著的音無仝款，表面上差5、6个音若像無差真濟，其實是會改變系統的，比論講華語的脣音干焦[9]有b、p（國際音標煞愛寫做p、ph），台語有p,ph,b（國際音標寫做……仝款p,ph,b），也就是講，仝款用羅馬字，一个「p」佇兩个語言內底代表無仝的音。

講起來是台語的臺羅較符合國際音標呢，欲佮「國際接軌」，按呢欲照台語改無？所以講無啥物國際毋國際的問題，拼音系統是學習的基礎，對語言本身有合無合上要緊。

閣再講，漢語拼音其實有真濟所在違反音位原則，嘛有受制佇拍字盤[10]26字母的範圍，致使有硬規定出來的用法。

5.注音的ㄐㄑㄒ是加出來的，嘛無符合音位原則啊。

這嘛是誤解。「ㄍㄎㄏ」「ㄓㄔㄕ」「ㄗㄘㄙ」攏袂當配「ㄧㄩ」，「ㄐㄑㄒ」是干焦會當配「ㄧㄩ」，雖然講「ㄐㄑㄒ」佮另外這三組攏「互補」，照音位原則應該毋免家己有一組，毋過，是欲共伊囥入去佗一組（以上參考何大安）？

咱會曉講台語的人會感覺講干焦佮「ㄗㄘㄙ」這組有合，這是因為台語ts,tsh,s（就是華語的ㄗㄘㄙ）嘛有顎化的現象，毋過k,kh,h（ㄍㄎㄏ）無，就是咱有「ki,khi,hi」這款組合華語無，閣來是咱無「ㄓㄔㄕ」，所以咱才會感覺干焦「ㄐㄑㄒ」是加的，佮「ㄗㄘㄙ」會當合併。

講來講去，注音你嘛批評、羅馬字你嘛批評，你是贊成用啥物？

我上頭仔就有講矣，無一套符號是完美的（參考張裕宏、鄭良偉），國家欲用啥物符號來教育，是政策的選擇，毋過欲做出正確的政策進前，愛理性討論優點佮欠點，才會當根據國家需求選擇「較適當」的符號。我要意的是理性討論。

註解：

[1]相拍電：短路。轉自「理智斷線」

[2]先品：先聲明

[3]合軀：（衣服）合身

[4]鬥句：句子押韻

[5]順紲：順便

[6]百捅年：一百年多一點點

[7]便便：現成

[8]一大捾：一大串

[9]干焦：只（有）

[10] 拍字盤：鍵盤，其中一種翻譯