繼續做 Liz

 

有時仔我會想講，我是按怎會行到遮，若像咧觀察一條溪河按怎轉彎踅斡，水家己揣方向，無共我問。我無影偌愛做我ê工課，台語復振、推廣、研究、演講、教育、座談、寫會了袂盡ê計畫佮報告，我攏做有路來，嘛做了袂䆀，就一直做lueh。講起來，予人需要，是危險ê代誌，予你袂赴問家己欲抑毋。

講我無熱情嘛毋著，我毋是自頭就無感。較早有影不時會歡喜，揣著一个語源、推動一項政策、建立一套制度、創立一个專案、完成一項閣一項ê成果，足爽。後來tsia-ê爽快煞沓沓仔勼去、蔫去，追求變做責任，想欲變做著愛，成就感變做免洗箸，用過就無矣。無法度啊，啖過ê滋味，閣再食著就袂閣有驚喜。

講甲若像偌不得已，嘛毋是，曷無人逼我。我一面咧喝忝，一面閣毋願停。我uan-na會責備家己，哪會欲共家己燒甲賰火烌，袂輸若無夠忝無夠喘就毋知愛按怎坐按怎䖙。我嘛毋是完全無感覺啊，我知影我忝，這款忝毋是歇幾工仔就通恢復。伊若像交落枕ê痠抽疼，較深層ê筋就是挽袂著。

有時我會做寡仔代誌來挔柴添火，比論講，來共中學課本ê古文標文讀音，未來凡勢通鼓勵國文老師用台語教古文。結局就是，標兩句仔就共放leh。過去做著趣味ê台語工課，這馬若像干焦賰責任。

責任uan-na會使人麻痺，管待家己佮意抑無佮意。有時我感覺我若像「永動機」，內底有安責任感佮自我要求ê gí仔，時間若到就會紡。Eh，這凡勢嘛是一款性命力？只是運作ê所在無春天ê光景，其實夏秋冬嘛無，就是一个地下室。

跔佇地下室拍拚，其實我袂討厭，只是定定會𤺪。我知影家己會繼續做，袂逃走、袂擋恬、嘛袂真怨慼。袂使，愛有一个較正面ê結尾。無，按呢啦，來sip兩杯仔，看欲佇佗位鬥一个窗仔抑是深井，提醒家己不時看一下仔外口，佮人講人話，嘛予別人有應話ê機會。