馬崗 (Báu/Má-kong)

昨昏佮阿爸阿母探路，任務結束了後，傱去馬崗 (Báu/Má-kong) 佮卯澳 (Báu/Má-ò) 行行 leh，無疑悟煞見證阿媽少年時代 ê 歷史。

遐有一間「阿萬 kám 仔店」（當然啦，伊寫 ê 是柑仔店），開講 ê、交關 ê，不止仔 ka-ia̍h，若像是這个景點 ê 指標商店之一。

阮阿媽是馬崗人，嫁予阿公進前攏蹛佇遮，雖然是分--ê，毋過 in 養爸（阮外祖）誠惜伊。阮阿爸佮阿姑細漢 ê 時攏捌去 tshit-thô 過，阿爸講，古早遮海墘仔攏細粒石仔（毋是沙仔喔），海湧起落 ê 聲音足吵

阮佮𥴊仔店頭家(?)、頭家娘(?)開講，原來，八、九十年前，頭家 ê 五叔仔共阮外祖打 (tànn) 這間 kám 仔店，就一直經營到這馬。原底 ê 位置較倚海，彼時閣無駁岸，有一冬風颱來，規間店予風颱請去，才閣退一點仔起這馬這間。

開講了，佇涼亭仔看著一个阿婆，阮阿爸行過去就佮伊相借問：阿婆，你家己一个佇遮看海喔？我阿蝦 in 囝啦，幾若年前𤆬阮阿母來遮行，有拄著你。

我一下聽，隨倚去阿婆邊仔坐，阿婆應該是袂認得阮阿爸，毋過伊佮阿媽誠熟似，伊講阿媽加伊幾若歲，「我彼當陣仔佮伊按呢結頭鬃仔尾neh」。原來是阮阿媽 ê 姊妹仔伴

簡單記幾句仔伊講 ê 話，阮問 ê 話先閬過：「我中風四五年矣，曷袂做工課啊，86矣。伊較早蹛尖山仔跤，我自細漢就蹛遮。啊老矣無效矣啦。我攏嘛逐工嘛蹛遮坐啊，哪會無聊，看車看海，攏有啦，ah 無欲 taih？老歲仔 tann 欲 taih？我姓游（尤？）。較早生濟个，分人，食無好，我是予阮阿媽撼 (hám) 爾爾，像按呢，欲暗仔，tún 就撼。阮阿公嘛惜，阮阿媽就愛撼人按呢，用彼秀梳仔(siù-se-á)，撼到地會死 neh。」

阮揣人開講 ê 重點是地名馬崗佮卯澳 ê 唸法， kám 仔店兩个60左右，阿婆86，in 分別講：Má-kong、Má-ò 佮 Báu-kong、Báu-ò，啊阮兜是講 Má-kong、Báu-ò。所以我咧想，可能上古早是Báu-kong、Báu-ò，後來受著漢字佮外來人口 ê 影響，才會生出 Má 音。

暗時仔去卯澳食海產，阿爸大歡喜，請阮食龍蝦，規尾落去炊，頭家嘛是熟似 ê，閣送阮兩隻蟳仔，家己人食飯上快活就是免顧慮形象，龍蝦頭、蟳仔跤，攏予我 khè 甲清氣溜溜