國家語言發展法推展的過程

拜五去參加文化部國家語言發展法機關協商，這是共法案送去行政院進前上重要的程序，各機關佮各縣市攏有派代表，針對in的意見隨條討論。這改的版本，雖然可能猶有遺憾，毋過其中有幾个真重要的進展佮「光點」（真正足光），我會用另外一篇文章說明。

這篇是，開會過程中想著這件代誌上起頭是按怎來的，而且我有留當時的紀錄。以下照時間順序講，當然，kan-na是我的觀點、我知影的部份。

Iáu-siū, tsit-má tsiànn-bûn tsiah beh khai-sí……

鄭社長過身了後，台語佇政治方面的運動若像就恬靜一段時間。2016年初，總統佮立委選舉結束，眾台語運動者感覺毋捌有遐好的勢面，就相招欲進行後一階段的運動（我佇這个時間點予信翰理事長揣去參與）。

2016/1/21暗時，佇臺中教育大學開第一改討論會，周清玉董事長欲安排逐家佮準副總統陳建仁見面，一方面討論欲共副總統提出啥物訴求，一方面嘛討論台語社團未來欲運作啥物，就有講著「國家語言發展法」的立法運動。另外我提出，國家其實無完整的語言政策，政府無才調做，咱會當先做，來寫一份「國家語言政策白皮書」，予新政府參考，逐家有贊同，決議先辦工作坊來執行。

彼時嘛有約束，咱逐個月愛開一改會。

重點來矣，一切的起頭，是下面這个會議：

摘一項上重要的決議：

紀錄後面的內容，就已經是「國家語言發展法Workshop 1」的目標、內容、時間、地點、欲邀請的貴賓、分工（效率夭壽懸，有幾若个是現場隨敲電話就定著矣），竟然閣有針對管版草案的文字修改（是按怎兩點半鐘會當決定遮濟代誌）！

2016/3/27，「國家語言發展法Workshop 1」佇師大舉辦，相關的紀錄佮成果全部佇遮：https://goo.gl/1M2hVb（有演講影片、會議手冊佮會議紀錄，紀錄內底有演講摘要，當然是我做的^^）。佇頂面的基礎上，就照當初的計畫招真濟相關人員來實際上討論法案。2016/4/8一改（講甲信翰理事長著趕尾幫車轉臺中）、2016/4/13一改，民間版的法案就按呢完成。

其中有一件足要緊的代誌，2016/4/1，鄭麗君猶是立委，已經有風聲講伊會做文化部長，國家語言發展法的主管單位是文化部，伊準無做部長嘛是教育文化委員會，所以阮提真濟資料去揣伊。佳哉我以外逐家攏足愛翕相，所以有留證據：

頭前講著的兩項主要目標：語發法佮專責單位，伊攏有接受，而且是伊主動講：若是行政院層次的專責單位無遐緊有，至少教育部、文化部攏愛有專責單位。

（哇，攏真正有矣neh，教育部有本國語言推動辦公室，文化部有國家語言發展科。當然按呢猶無夠，毋過，遮偌久爾爾，就攏有矣！）

好，民間版草案出來以後，有予幾若个立委，黃國書是當時教育文化委員會的召委，管碧玲是本成就有草案，掠外，2016/4/26，信翰理事長、豐惠老師佮我，去拜會時代力量，後來in嘛有提案，而且in的版本是上進步的。

三个提案，頂會期本來有機會通排，黃國書的助理誠頂真，有咧想辦法予法案至少詢答一改，毋過真可惜，立委拄上任，黨產佮轉型正義攏真趕緊，頂會期無排案。加上確定鄭麗君做部長，情勢就轉變做等文化部提對案。

部長上任無偌久，就聽著國家語言發展科成立的消息，後來有去拜會，確定欲捒法案，紲落來一段時間阮共重點囥佇教育部（另外一个故事），到年尾仔，有「國家語言發展法研究與規畫」案，我代表中教大去報告，年底開始執行，2017頂半年辦理7場公聽會，閣有誠濟場諮詢會（攏是中教大團隊咧無閒，我kan-na鬥相共爾爾）。

目今，已經進入機關會商，而且，我認為是佇爭議盡量少、真有可能會過的前題下，考慮足周至閣有作用的版本。

7/23會辦最後一場公聽會，我會共每一條的用意佮精神共逐家報告。

Guá sī hun-keh-suànn. Guá sī hun-keh-suànn. Guá sī hun-keh-suànn.

毋知有人想著無，啊，台灣本土語言推動委員會，是啥啊？一個月開一改會後來咧？

喔，彼是彼工阮家己號的名，後來，就無第二改的紀錄矣XDDD