講一个好心好行投資失敗送囝學戲煞創造傳奇的故事XD
古早有一个踏三輪車趁食的王土香(thôo-hiunn)，看著路邊有一个半遂的李先生，佇塗跤咧䠡(tshê)，真可憐，毋但共伊載，閣佮幾个朋友搭一間草厝仔予伊安居。李先生心內感激，毋過嘛想講按呢袂久長，就共王土香講：「我想我應該猶是愛家己趁錢，你看按呢好無，我會曉賣藥仔，你踏三輪車載我來去賣，錢咱才來分。」in就按呢開始做伙賣藥仔。
過程中知影原來李先生原本佇故鄉欲娶一个門風，煞佇成親進前帶病，才會袂行路，對方就按呢退婚，in厝裡的人竟然共伊載去到嘉義「放生(pàng-senn)」。李先生in先祖過去佇唐山有咧做布袋戲，伊嘛會曉做，所以就佇賣藥仔的時，加減做布袋戲來招人客，就按呢，王土香出本錢佮出車，李先生出藝，兩人合作趁錢。
斯當時李先生的姑丈佇嘉義有一棚布袋戲班，過身的時，in兜的人欲4,000箍規棚頂出去。李先生佮王土香參詳，叫伊去借錢來頂，李的會當主演，彼陣出一棚戲500箍，in想講按呢做十棚就趁有本錢矣，所以王土香就共in母舅借，丈人in兜做山種果子，日子算誠好過，後生一个查某囝一个，真惜這查某囝，就借in 4,000箍，按呢共彼棚戲頂落來。
想袂到代誌毋是戇人想的遐爾簡單。有主演是無毋著啦，毋過無後場啊，若允一棚，就愛隨个去叫，彼時閣無電話，王土香著愛踏鐵馬去隨人兜請後場；閣較僥倖的是，一棚戲金是500無毋著啦，啊你敢免分予後場？一棚戲金，該分予遐的跤數(kha-siàu)的分分咧以後，in兩人一个干焦分12箍！今4000是欲趁甲底當時才會回本？王土香看毋是勢，就無想欲做矣，希望李先生共戲棚頂過，毋過伊哪有錢？自按呢兩个人拆股，無閣做伙矣。
後來王土香家己經營戲班，今毋但後場愛揣，夭壽僥倖矣，連主演嘛愛去叫，甚至對嘉義騎鐵馬去虎尾請！就算按呢，戲的品質嘛無可能會好。有人就共伊講，你規氣共恁囝一个送去學師仔，以後予恁囝來共你做才會快活，伊感覺有理，毋過大漢囝已經傷大漢，嘛無興趣這，第二的王玉堂才11歲，國校猶未畢業，等伊讀了，就去五洲園綴黃俊卿，兩年以後離班，轉來接阿爸的戲棚。
彼時，王玉堂猶是17歲的囡仔，佮伊一个朋友叫做矮仔彰，兩个就開始做戲，因為無夠懸，做棚仔戲攏愛夯椅仔跂跤(kué-kha)。逐家想講哪有兩个囡仔咧做布袋戲？去共看覓咧，看一下閣，喔！袂䆀喔！共倩來做喔！就按呢一个報一个，愈來愈出名。沓沓仔戲路就穩定矣，加上政府規定演出的團體愛註冊登記，「義興閣」就按呢正式掛牌。
王玉堂的人生代表作是「萬教風波仇：阿拉仔原始人」金光布袋戲，兩个主角阿拉仔原始人佮鬍鬚失戀人，本底是別齣戲內底的妖道，毋過人客足佮意這兩个，發展到後來變做這兩个是主角（小小兵的概念XD），當年是真正轟動。
故事的後半段，真正是「神展開」，有風颱、有Rock，有熱情的少年人。其實後面才是重點，就等節目出來報逐家知。我的文章，寫的是攏是故事背後的故事，我佮意的故事。
-------
下面是語言紀錄：
●彼沿的阿姨阿媽，真正攏會稱呼大官是「老歲仔」
●較早，囡仔耍的尪仔是鋸屑烌做的
●人叫thôo-hiunn，寫是寫土香，你欲按怎？
●「畢業」講幾若改攏是pī-gia̍p，咱做研究的嘛莫閣堅持矣啦（誤
●扮仙仝款用官話，毋過因為布袋戲尪仔咧排就無像人咧扮遐好看，所以in的錄音帶真趣味，官話戲文講了，會用台語解說每一个仙的名姓佮身份。
2016/10/7 義興閣第一工攝影工課以後的紀錄
沒有留言:
張貼留言