[烏白記]新樂園吳清秀

「生不逢時」，就是像伊按呢。

伊真正足興做布袋戲，而且足有藝，口白講甲誠有氣味、有戲肉，叫字是清閣明，雖然是放錄音帶的演出，毋過夯尪仔的時嘛袂凊彩弄，錄音帶是伊家己錄的，日戲做的是「路遙知馬力」的傳統故事，規齣戲，無譀講的，無一字聽袂清楚。

毋過伊無赴著布袋戲上tshìng的時代，若是伊拚台拚有著，我想，今仔日會成做傳奇的是伊毋是in阿兄，畢竟連in阿兄都講伊學較濟。

------

閣來是永靖腔。過去干焦佇冊本頂頭「看」著永靖腔，閣有改口語考卷的時真正聽著，毋捌真正佮永靖腔的人講話。伊的永靖腔有夠純，除了-ing的特色以外，-iang嘛足濟，予我感覺足親切。

而且伊有夠𠢕講話。過去，見擺有人講愛聽我講話，我攏感覺是花言巧語，這馬我真正體會著足想欲聽一个人講話是啥物意思。喔，著，佮伊開講以後，我感覺我台語程度實在無好，有影無啥會曉講台語XD

----

這个對民間發展出來的商業傳統藝術，確實是那來那落衰矣，恐驚是無法度回頭。今年，彰化縣文化局，共in遮的傳統藝術團體一年一改的文化場演出取消，理由仝款是，經費無夠，所以彰化過去上奢颺的布袋戲團，今年完全無文化場的演出。

捒台語的團體內底，教會傳統的，對這款廟口發展出來的傳統藝術並無興趣，保存傳統藝術的單位，基本上嘛對語言無概念（看過去的文化部佮傳藝中心就知，鄭麗君做部長，才有機會佇文化部內底做語言的工課），這款傳統藝術無注重語言哪會使？毋過語言運動佮傳統藝術兩爿基本上無啥交插，實在佮語言復振的背景（教會/學者）有關係。

2016/10/6 新樂園三團攝影工課以後的一寡感想