選舉選了矣，這改毋是台派選上䆀 ê 一改，講起來無需要失志。昨昏聽著一个講法感覺袂䆀：都已經搝兩支「起盡磅」矣，敢閣欲數想搝第三支？誠濟代誌攏是按呢嘛，進兩步了後，定定會先退一兩步，才會閣進兩三步。
當然對台語工課來講，勢面誠不利，畢竟看範勢本土猶是票房毒藥，民進黨 tann 可能會閣較退，至少表面上袂對本土議題放較濟氣力，尤其語言閣是內底較歹紡閣較無票 ê。
KMT 免講，較費氣 ê 是山寨黨這馬變做關鍵少數，in 閣是上蓋無文化概念 ê 黨，未來 in 對語言議題 ê 立場予人誠悲觀。我無認為 in 會有立場，in 應該會共當做威脅佮交換 ê 資本，予本來就已經歹做 ê 代誌閣較歹做。
是講，我今仔日較冷靜以後是按呢想：課綱，拄好是立法系統較磕袂著 ê 政策，我 teh 臆 in 對課綱凡勢嘛無啥理解，無的確咱拄好會當對課綱落手。閣有，後一改選舉 ê 時，課綱已經差不多完成矣，所以這馬除了部長人選這个變數以外，大環境就差不多是按呢矣。
我這馬 ê 身份，已經袂使像過去按呢直接參與遊說佮拜會，我嘛毋知影後一波台語運動佇佗位。所以，我會共我對課綱 ê 想法佇 tsia 寫出來，若是有人感覺小可仔會當參考，歡迎夾去配。
108課綱因為國家語言發展法，有111修訂版，予本土語言（台語、客語、原住民族語）延伸到第四、第五階段（加上臺灣手語直接一到五階段），實施以來，除了原底 6 年課程 ê 舊問題猶未完全解決，新 ê 問題佮需求已經開始產生矣。
課綱十年修訂一改，118課綱 ê 前導研究佮大方向，已經開始研討，本土語言若是想欲愛有突破，這馬著愛開始振動矣，若無，等 kah 架構完成，就袂赴矣。
我個人 ê 興趣一直攏毋是佇課綱，只是毋知按怎一直佇教育界內底踅袂出去(?)，既然按呢，我就共我這段時間看著、想著的，小整理一下，了後，我就欲放下這件代誌，去做別項。
1. 課綱傷過理想性、文字描述為著配合議題融入煞傷 li-lô。
2. 國小到國中、高中，學習接袂起來，而且課本對多數學生來講傷困難，對少數學生又閣傷簡單。
3. 各班學生語言程度落差傷過大，毋知欲按怎教。
4. 一禮拜一節台語課傷少。
目前初步 ê 解決方案是：
1. 建立分級能力指標
1.1 課綱「現有 ê 分級設計」愛有實際作用佮標準，建立明確 ê 分級語言能力指標。會使佇CEFR ê 架構之下分予較幼，予伊符合各學習階段 ê 需求。
1.2 課綱「學習表現」愛對應能力指標；「學習內容」是教學佮評量 ê 素材，議題融入、各語言文化內涵、地方特色等等，攏屬學習內容 ê 範圍。
1.3 予學習表現佮學習內容有明確 ê 分工，就會使予狀況相近 ê 語言使用仝款 ê 學習表現，干焦學習內容需要有無仝語 ê 版本，予課綱簡省、實用。
2. 予教學難度有伸勼
2.1 各學習階段選用 ê 級數會當有伸勼，對應 ê 分級毋但愛會當向下，嘛愛會當向上，毋管能力懸低，攏有機會使用適合 ê 級數。
2.2 為著落實分級，會當以全班抑是全校做單位選級數，利用評量配套方案協助學校來判斷學生 ê 等級。
3. 教科書內容分級標示
3.1 由教育部公告詞彙、語法等等分級資料，當做教科書、教學現場、認證考試 ê 標準。
3.2 佇課綱內要求教科書著愛佇每一課內底做出分級標示，教師就會當照學生 ê 程度調整教學內容（有 ê 學生學到某一个範圍就有夠，有 ê 學生會當學較深），嘛會當為學生訂出無仝程度 ê 學習評量，予「差異化教學」會當落實，嘛客觀、有根據。（補充：「主科」 ê 教材教法已經累積足濟成果，相對來講，老師欲進行差異化教學，較有方向。本土語較欠類似 ê 研究，所以愛先替老師做分級，予老師較好操作，嘛較有全國一致性 ê 標準通遵守。）
4. 沉浸式/雙語教學
4.1 佇課綱內底規定本土語言佮英語愛有一定比例 ê 沉浸式/雙語教學，為著會當落實，愛根據各校教師 ê 專長，逐校會使結合無仝科目來實施，而且愛予雙語教師實質獎勵。
4.2 補助教科書商建立各科本土語言佮英語 ê 雙語詞彙表佮補充教材，協助老師進行沉浸式教學，予語言學習佮使用袂限定佇語言課，突破一禮拜一節本土語言課 ê 限制。
以上 tsia-ê ，是我這段時間以來累積 ê 想法，kan-na 是一个大概 ê 想法爾爾，愛閣繼續討論佮修正。目前我感覺第 4 項誠要緊，若是 sak 會振動、有效果，未來，本土語言課本身，會當集中共技巧佮智識，以台語來講，就是教臺羅、台語漢字、文白音、腔口差 tsia-ê。
閣有一个較幼 ê，是佮學習內容有關，就是「腔口差」。現行課綱有講著愛認捌、尊重腔口差，毋過實際上愛捌 kah 啥程度，無講，各地方嘛一直有「煩惱少數腔口消失」 ê 聲音，佳哉嘛看著誠濟對腔口保存要意、有共學生教腔口 ê 老師。我認為，學界應該愛有人共台語 ê 腔口差，研發出一套簡化、實用 ê 對照工具（毋但是表爾爾），予大多數 ê 現場教師會當利用這个工具來協助 in 做多元腔口 ê 判斷佮教學，這是學者會使做 ê。腔口毋是我 ê 專長，希望有別位研究者出來做。
最後，有關語言名稱，我 ê 初步建議是文章開頭 ê 圖按呢，應該免啥解說。
沒有留言:
張貼留言